Adam ómiri — elimizdiń basty qundylyǵy, sondyqtan men bul qadamǵa oılanbastan bardym
Aqtóbe oblysynda aýylynyń turǵynyn ólimnen qutqaryp qalǵan okrýg ákimi marapattaldy, dep habarlaıdy Almaty-akshamy.kz Baq.kz-ke silteme jasap.
Rýslan Baısaǵyzov — Aqtóbe oblysy Mártók aýdany Qaratoǵaı aýyldyq okrýginiń ákimi. Ol 1 maýsym kúni aýylyndaǵy 50 metrlik munaraǵa shyǵyp, ózine qol jumsamaq bolǵan turǵyndy ólimnen arashalap qalǵan.
Negizi oqıǵa bylaı bolǵan: aýyl turǵyny óz-ózine qol jumsamaq bolyp, aýylyndaǵy bıik munaraǵa shyǵady. Ony kórgen álgi azamattyń týystary men aýyl turǵyndary ý-shý bolyp, sabyrǵa shyǵarady. Biraq ólimge «asyqqan» álgi kisi olardyń sózine kónbeıdi, tipti, tótenshe qyzmettiń qyzmetkerleri de kómektese almaıdy. Sol sátte okrýg ákimi oqıǵa ornyna baryp, aýyl turǵynymen eki saǵat boıy kelissóz júrgizip, aqyry ony ólimnen qutqaryp qalady.
Aýylynyń turǵynyn qutqaryp qalǵan okrýg ákimin QR Memlekettik qyzmet isteri agenttiginiń Aqtóbe oblysy boıynsha departamentiniń basshysy Ádilbek Muqashev marapattap, oǵan QR Memlekettik qyzmet isteri agenttigi tóraǵasy Darhan Jazyqbaevtyń arnaıy Alǵys hatyn tabystady.
«Rýslannyń bul «erligin» qazir barsha mártóktikter aıtyp júr. Biz de osyndaı memlekettik qyzmetshilerimizdiń baryn maqtan etemiz. Rýslanǵa qyzmetinde sáttilik tileımiz», — deıdi departament basshysy.
Al okrýg ákiminiń aıtýynsha, ózine qol jumsamaq bolǵan kisi basqa bireýden qarajatyn ala almaı júrgen. Sol sebepti ózine nazar aýdartpaqshy bolypty.
«Oqıǵa ornyna shuǵyl túrde jettim. Alaıda kelissóz uzaq ýaqytqa sozyldy. Nátıjesinde ózine qol jumsamaq bolǵan turǵynǵa moraldyq qoldaý kórsetip, quzyrly mamandarmen birlesip tómenge túsirip aldyq. Adam ómiri — elimizdiń basty qundylyǵy, sondyqtan men bul qadamǵa oılanbastan bardym. Ári memlekettik qyzmetshi retinde aýylymnyń adamdaryna qoldaý kórsetý, kómek berý — meniń paryzym», — deıdi Rýslan.