QR İİM M.Esbolatov atyndaǵy Almaty akademıasy bazasynda İshki ister mınıstriniń Aýyspaly kýbogy jolynda petankten polısıa qyzmetkerleri men BAQ ókilderi arasynda birinshi respýblıkalyq týrnır ótti.
Sap túzegen qatysýshylar aldynda «Dınamo» deneshynyqtyrý sport qoǵamy tóraǵasynyń birinshi orynbasary Asqar Omarqulov týrnırdi saltanatty túrde ashyp: «İİM akademıasy bazasynda petankten ótkizip otyrǵan İshki ister mınıstriniń Aýyspaly kýbogy jolyndaǵy komandalyq birinshiliktiń maqsaty – atalǵan sport túrin tanytý, sporttyq ıkemdilikti jetildirý, jeńimpazdy anyqtaýmen birge, tilshi qaýym men quqyq qorǵaý qyzmetkerleri arasyndaǵy ózara yntymaqty arttyrý», – dep oıynshylarǵa sáttilik tiledi.
Petank (fransýzsha «retanque») – sózbe-sóz aýdarǵanda, «provans ped tanko» – «qaqqan qazyqtaı» degen maǵynany bildiredi. Óıtkeni, oıynshy dopty laqtyrǵan kezde dop jerge tımeıinshe aıaǵyn jerden almaýy kerek. Tartysty birinshilikke tórt komanda: «Alatau Aqparat», alań ıeleri, «Dınamo» DSQ, «Vremá» gazetiniń «Akýly pera» oıynshylary qatysty. Oıyn sharty boıynsha 15h4 m alańda komanda oıynshylary kezek-kezek metal sharlardy, (salmaǵy – 800 g) dopty kishkentaı rezeńke koshonet-shar (dıametri 30 mm) janyna múmkindiginshe jaqyn laqtyrýǵa tyrysty.
Tipti, metal-dop koshonetke tıip ketip, qarsylastyń dobyn ysyryp tastaǵan jaǵdaı jıi boldy. «Dınamo» DSQ oıynshylarynyń sheberligi kózge uryp turdy. Oıyn osynysymen de qyzyqty ótti. Tartysty oıyndar sońynda komandanyń bir ne birneshe shary qarsylastyń sharlaryna qaraǵanda koshonetke birtaban jaqyn bolýy jeńiske jeteledi. Oıyn barysynda ár osyndaı dop bir upaıdan komanda qorjynyna quıylyp jatty. Saıysqa petankten QR sport sheberligine kandıdat O.Soı qazylyq etti.
Tartysty básekede aýyspaly kýbokty «Dınamo» DSQ ıelendi, ekinshi júlde alań ıelerine buıyrdy. Jarys júldegerleri, oıynǵa qatysýshylar arnaıy syılyqpen, sertıfıkatpen marapattaldy. Petank – ıkemdilik, eptilik pen mergendikke mashyqtandyratyn qazaqtyń ulttyq sport túri asyq atýǵa uqsas oıyn. Alda «Dınamo» DSQ-ynyń 100 jyldyq merekesi, t.b. mereıli merekeler bar. Osyndaı bási bıik sporttyq syndarda asyq atýǵa mashyqtanǵan «Alatau Aqparat» komandasy bıik mejeden tabylaryna senimdimiz.
