Prokýrorlar Astananyń úleskerlerine eskertý jasady.
Prokýrorlar Astananyń úleskerlerine eskertý jasap, qandaı jaǵdaıda úlestik qurylysqa ınvestısıa salýǵa bolatynyn eske saldy, - dep habarlaıdy Almaty-akshamy.kz elorda prokýratýrasynyń saıtyna silteme jasap.
«Prokýratýra azamattarǵa zańdy aınalyp ótý úshin aldyn ala shart, nıet sharty, ınvestısıa, brondaý jáne osy sıaqty jasyryn sharttar jasasatyn josyqsyz qurylys kompanıalarynan abaı bolý kerektigin eskertedi. Eldiń qarajatyn tartý úshin qurylys salýshylar turǵyn úı qurylysyna úlestik qatysý jóninde shart jasasýǵa mindetti», - deıdi qalalyq prokýratýra.
Vedomstvo málimetinshe, sońǵy 6 jylda úleskerlerdiń múddesi úshin 104 mıllıard teńgege 143 talap aryz jazylǵan. Nátıjesinde 15 qylmystyq is qozǵalyp, 45 adam sottalyp, 147 adam ákimshilik jaýapqa tartylǵan.
Tek eki jaǵdaıda ǵana qurylys salýshy úleskerlerdiń aqshasyn úlestik qatysý týraly shartsyz tarta alady:
- qazaqstandyq turǵyn úı kompanıasymen shart bolsa
- qurylys salýshyda ákimdiktiń ruqsaty bolǵan jaǵdaıda.
«Barlyq azamattardy muqıat bolýǵa jáne óz aqshalarymen táýekel etpeýge shaqyramyz», - dedi prokýratýra.