Almatydaǵy azamattyq avıasıa akademıasynda osy kúni 300-den astam qyz bala oqıdy
Olardyń 30-y áýe kóligin basqaratyn ushqysh bolǵysy keledi, dep habarlaıdy Almaty-akshamy.kz Almaty.tv-ǵa silteme jasap.
Ushqysh mamandyǵynda oqıtyn Móldir basynda hımık bolýdy armandaǵan. Ári ata-anasy da avıasıa salasyn tańdaýyna qarsy bolypty. Alaıda ol degeninen qaıtpaı, túbinde ózi qalaǵan oqý ornyna túsken eken. Onyń endigi armany – shetelde tájirıbe jınap, bilimin ushtaý.
«Mektepte ushqyshtarmen konferensıa boldy. Sol kezde komandır pılottyń áńgimesi, ózin-ózi ustaýy, ushaqtyń ushýy týraly túsindirýi, bári maǵan unady. Sol sátte bir kúnde ushqysh bolamyn dep sheshtim», - deıdi Azamattyq avıasıa akademıasynyń stýdenti Móldir Turǵan.
Arman qýyp, sonaý soltústikten kelgen Dilnáz bala kezinen áýejaıǵa qatysty kınotýyndylardy kóp kórgendikten, avıasıa salasyn tańdapty. Armany aldamaǵan. Qazir ol áýejaılardyń jerdegi radıoelektrondyq jabdyqtaryna qyzmet kórsetý mamandaǵynda bilim alyp jatyr.
«Men 9-synypty bitirgennen keıin áýejaıǵa qatysty fılm kórgen bolatynmyn. Iaǵnı jumys istep júrgen adamdardyń atmosferasy maǵan unaǵandyqtan, 10-synypta fızıka pánin tańdadym. Aldaǵy ýaqytta áýejaıda jumys istep, ony damytqym keledi», - deıdi Azamattyq avıasıa akademıasynyń taǵy bir stýdenti Dilnáz Nurmuhambet.
Búginde azamattyq avıasıa akademıasyn bitirgen arýlardyń 15-i otandyq ushaqtardy basqaryp júr.
«Qyzdarymyz qazir tirshiliktiń kez kelgen tusynda óz ornyn taýyp jatyr. Aspandy baǵyndyryp júrgen ápke-qaryndastarymyz az emes», - dedi Azamattyq avıasıa akademıasy akademıalyq jumys departamentiniń dırektory Arken Shanlaıakov.
Bolashaq ushqyshtar 1 kýrsta jaı ǵana teorıalyq bilim alsa, ekinshi jáne úshinshi jyldan bastap áýe sımolátory dep atalatyn ushaq maketinde tájirıbeden ótedi.
Avıasıa salasyn ıgerip jatqan qyzdardyń endigi armany oqýlaryn úzdik aıaqtap, otandyq áýe komanıalaryna jumysqa turý.