Ol 350 shaqyrymdy 47 saǵat 23 mınýtta júgirip ótti.
Qurlyq áskerleri áskerı ınstıtýtynyń «Álı» oqý-jattyǵý ortalyǵy qamtamasyz etý rotasy jaýyngerlik kóliginiń komandıri, 3-synypty serjant Raýan Abylhanovtyń esimi Qazaqstannyń Rekordtar kitabyna engizildi, dep habarlaıdy Almaty-akshamy.kz
Qorǵanys mınıstrliginiń málimetinshe, áskerı qyzmetshi últramarafondy sátti aıaqtady. Ol «Álı» oqý-jattyǵý ortalyǵynan Almaty oblysynyń Shelek aýdany baǵytynda 350 shaqyrymdy 47 saǵat 23 mınýtta júgirip ótti.
Marafonshyny máre syzyǵynda ınstıtýt basshylyǵy, áriptesteri, týystary men dostary qarsy aldy.
«Tabandylyq pen jeńiske degen erik-jigerdiń arqasynda 3-synypty serjant Raýan Ábilhanov 47 saǵat 23 mınýtta mejeli qashyqtyqty júgirip ótip, rekord ornatty. Raýan - óz maqsatyna jetýde bar-kúsh jigerin aıamaǵan naǵyz jaýynger», – dedi áskerı ınstıtýt bastyǵynyń birinshi orynbasary, podpolkovnık Jánibek Sarǵazın.
Raýan Ábilhanovtyń jeńil atletıkamen aınalysqanyna on jyldan asypty. Rekordsmen - Almatyda jáne elimizdiń Qarýly Kúshterinde ótken birneshe marafondardyń jeńimpazy.
«Bul - meniń ǵana emes, barlyq áriptesimniń, týystarymnyń, dostarymnyń jeńisi. Olardyń senimi men úmitin aqtaý úshin bar kúsh-jigerimdi saldym», – deıdi 3-synypty serjant Raýan Ábilhanov.
Marafonshynyń qurmetine ótken saltanatty jıynda Qazaqstan Rekordtar kitabynyń ókilderi oǵan tıisti sertıfıkat tabys etti. Al dostary Kia Rio avtokóligin syıǵa tartty.