Qazaqstannyń Qarýly Kúshteri mamandardy daıarlaýda sheteldikterden kem túspeıdi.
1992 jyly dál osy kúni Qazaqstan Qarýly Kúshteri Bas shtabynyń Barlaý basqarmasy quryldy. 5 qarasha – barlaý bólimsheleri áskerı qyzmetshileriniń kásibı merekesi, dep habarlaıdy Almaty-akshamy.kz QR Qorǵanys mınıstrliginiń baspasóz qyzmetine silteme jasap.
Áskerı barlaý memlekettiń qaýipsizdigin qamtamasyz etýde mańyzdy ról atqaryp, eldiń qorǵanys qabiletin nyǵaıtýǵa aıtarlyqtaı úles qosady.
Búgingi kúni arnaıy operasıalar kúshteri, barlaý bólimderi men arnaıy maqsattaǵy bólimsheler qarqyndy damýda.
Jedel, jaýyngerlik daıarlyq is-sharalary barysynda barlaýshylar daǵdylaryn jáne sheberlikterin jetildirip, shyńdaıdy. 2021 jyly barlaý bólimsheleriniń áskerı qyzmetshileri «Qalqan», «İzdeý», «Otpantaý» oqý-jattyǵýlaryna qatysty. Sońǵy manevrler barysynda áýe jáne jer ústi barlaýynyń búkil is-qımyldaryn áskerler toptary iske asyrdy. Nátıjesinde shartty qarsylastyń kúshteri men quraldaryna joǵary dál soqqylar jasaldy.
Oqý-jattyǵýlar men keshendi tekserýlerdiń nátıjeleri Qazaqstannyń Qarýly Kúshterinde mamandardy daıarlaýdyń sheteldikterden kem túspeıtin derbes, otandyq júıesi barlyǵyn dáleldeıdi.
Asa kúrdeli, ómirge qaýipti tapsyrmalardy oryndaýda barlaý bólimsheleriniń áskerı qyzmetshileri aıryqsha tózimdilik, batyldyq pen kásibı sheberlik kórsetedi.
Otanǵa shyn berilý, boryshyńdy seziný, janqıarlyq tanytý – memleket múddelerin qorǵaý jolyndaǵy áskerı barlaýshylardyń basty qasıetteri.