Kúdikti Ózbekstan Respýblıkasynyń 28 jastaǵy azamaty bolyp shyqty
Astanada dámhanadan shyqqan adamdy daıashy tonap ketti, dep habarlaıdy Almaty-akshamy.kz.
Astananyń 60 jastaǵy turǵyny áldekim ózine shabýyl jasalyp, 690 myń teńgesin urlap ketkenin aıtyp, polısıa kómegine júgindi.
Keshke qaraı er adam Qudaıberdiuly kóshesindegi shaǵyn dámhanaǵa kirip, tamaqtanǵan. Qyzmet kórsetýshi daıashy er adamnyń qol sómkesinde kóp aqsha baryn baıqap qalǵan.
Er adam dámhanadan shyqqanda daıashy onyń artynan ilese shyqqan. Sóıtip qurbanynyń artynan kelip, bilegin moınyna orap, tunshyqtyra bastaıdy. Sodan keıin er adamnyń qolyndaǵy barsetkasyn julyp alyp, qasha jóneledi.
Jedel-izdestirý is-sharalary barysynda qaraqshy Qaraǵandyda ustaldy. Ol Ózbekstan Respýblıkasynyń 28 jastaǵy azamaty bolyp shyqty, ol óz kinásin moıyndady.
«Osy fakti boıynsha sotqa deıingi tergeý amaldary qolǵa alyndy. Ustalǵan adamnyń Astana aýmaǵynda jasalǵan basqa da osyndaı qylmystarǵa qatysy bar-joqtyǵy tekseriledi. Kúdikti ustaý ızolátoryna qamaldy», - dedi QR İİM baspasóz qyzmeti.