Sıfrlyq damý, ınovasıalar jáne aeroǵarysh ónerkásibi mınıstri Baǵdat Mýsın «ArselorMıttal Temirtaý» kompanıasyndaǵy apattardy azaıtý joldaryn aqparattyq tehnologıadan izdeý kerektigin aıtady, dep habarlaıdy Almaty-akshamy.kz Inform.kz-ke silteme jasap.
«Búgin Premer-Mınıstrmen birge Qaraǵandy oblysynda is-saparmen boldym. IT-naryǵyn damytý, baılanys sapasyn jaqsartý, ónerkásip sektorynda sıfrlyq transformasıalaýdy qoldaný prosesteri týraly aqparatpen bólistim. Atap aıtqanda, «ArselorMıttaldaǵy» óndiristik nysandardy aralaı otyryp, Álıhan Asqanulyna óndiristik prosesterdi sıfrlandyrýǵa jáne kásiporyndarda qaýipsizdikti qamtamasyz etýge yqpal ete alatyn 5G tehnologıasynyń múmkindikteri týraly baıandadym» dep jazdy mınıstr Facebook paraqshasynda.
Onyń aıtýynsha, Úkimet basshysy «ArselorMıttal» kásipornyna 5G jelileri negizinde úzdik tájirıbelerdi qoldana otyryp, jedel túrde sıfrlandyrý jumystaryn júrgizýge naqty tapsyrma bergen.
«Mysaly, «aqyldy kaskalar» júıesin engizý arqyly shahtalardaǵy jumysshylardyń ornalasqan jerin anyqtaýǵa bolady, bul júıe olardyń dıspecherlermen turaqty baılanysyn qamtamasyz etedi jáne shahtalarda bolyp jatqan oqıǵalar týraly onlaın rejımde úzdiksiz aqparat bere alady. Bul jumyskerlerdiń ómirin saqtap qalýǵa jáne jaraqattanýyn azaıtýǵa baǵyttalǵan bir ǵana mysal. Sıfrlandyrýdyń arqasynda kóptegen mańyzdy prosesterdi ózgertýge jáne óndiristegi adamdardyń ómirin qorǵaýǵa bolady» dep atap ótti Baǵdat Mýsın.
Aıta keteıik, sońǵy 15 jylda «ArselorMıttal Temirtaý» zaýyttarynda 100-den astam jumysshy qaza tapqan.