Qazaq boksshysy, Sıdneı Olımpıadasynyń chempıony Ermahan Ybyraıymov saılaý ýchaskesine kelip, otbasymen birge daýys berdi.
Sportshy el bolashaǵyna beıjaı qaramaıtyndar qatarynan. Búgin ol otbasyn ertip, óz tańdaýyn jasady, dep habarlaıdy Almaty-akshamy.kz.
«Tuǵyry myqty el bolý úshin óz memleketimizdiń taǵdyryna beıjaı qaramaýymyz kerek. Ultqa, elge degen janashyrlyq osyndaı saıası naýqandarǵa qatysýdan bastalady. Óıtkeni, bul óte mańyzdy ári jaýapty qadam. Tipti, búgingi kúndi búkil qazaqstandyqtar úshin meıram desek te bolar. Ulystyń Uly kúni Naýryz merekesimen tuspa-tus kelgen saıası naýqannan eshkim qalys qalmaıdy dep senemin. Mine, men de otbasymmen óz saılaý ýchaskemizge kelip tańdaýymyzdy jasadyq. Qazaqstannyń bolashaǵyna beıqam qaramańyzdar, óıtkeni árkimniń daýysy mańyzdy», - deıdi sportshy.