Qazaqstan Qarýly kúshteriniń áskerı qyzmetshileri 3-8 naýryz aralyǵynda Arızona shtatynyń Fenıks jáne Florens qalalarynda ótken "Úzdik jaýynger-2024" jarystarynda oljaly óner kórsetti.
Serjant Muhıadın Smaǵul men 2-synypty serjant Orynbek Sandybekov "Úzdik jaýynger-2024" jarysynda baq synaǵan 40 qatysýshynyń ishindegi birden-bir sheteldikter boldy, dep habarlaıdy Almaty-akshamy.kz QR Qorǵanys mınıstrligine silteme jasap.
Ulttyq ulannyń, Qarýly kúshterdiń jáne AQSH-tyń basqa da kúshtik qurylymdary arnaıy bólimsheleriniń áskerı qyzmetshileri qatysqan jarysta qazaqstandyq áskerıler jaýyngerlik daıyndyqqa baılanysty barlyq kezeńderde úzdik nátıjeler kórsetti.
Áskerı qyzmetshiler Muhıadın Smaǵul men Orynbek Sandybekov dene daıyndyǵy, amerıkalyq úlgidegi atys qarýyn bólshekteý, qurastyrý, olardy jaýyngerlik kúıge keltirý, tapanshadan, avtomattan jáne pýlemetten atý jónindegi normatıvterdi sátti oryndady.
Jarys baǵdarlamasynda, sondaı-aq radıostansıany baptaý jáne baılanysqa shyǵý, túngi jáne kúndizgi ýaqytta jergilikti jerdi baǵdarlaý, alǵashqy medısınalyq kómek kórsetý, jaralylardy alyp shyǵý sekildi tapsyrmalar da boldy.
20 shaqyrymdyq marsh kezinde qolyndaǵy qarý-jaraqpen jáne 16 kılogramdyq múlikpen 35-shi gvardıalyq desanttyq-shabýyldaý brıgadasynyń serjanty Muhıadın Smaǵul bir saǵat 59 mınýtta mejeli qashyqtyqty eńserip, jeńiske jetti.
«Jarysty uıymdastyrýshylar baıqaý tarıhynda mundaı jaǵdaı áli bolǵan joq dep málimdedi. Bizdiń desantshymyzdyń jetistigin aty ańyzǵa aınalǵan kenıalyq júgirýshi, Olımpıada chempıony Elıýd Kıpchogeniń rekordymen salystyrdy», – dep naqtylady Qazaqstan Qarýly kúshteriniń bas serjanty sheber serjant Temirbek Halyqov.
2-synyp serjant Orynbek Sandybekov te jaýyngerlik daıyndyq pánderinde úzdik nátıjege jetip, marshta ekinshi orynnan kórindi.