Ol 2021 jyly da chempıon tıtýlyn alǵan bolatyn
Elordadaǵy fızıka-matematıka baǵytyndaǵy zıatkerlik mektebiniń túlegi Anýar Akchýrın baıdarka men kanoede esý boıynsha AQSH-tyń Sınsınatı qalasynda ótken ashyq chempıonatta birinshi oryndy enshiledi, dep habarlaıdy Almaty-akshamy.kz.
Ol 2021 jyly da chempıon tıtýlyn alǵan bolatyn.
Búginde halyqaralyq sanattaǵy sport sheberi atanǵan Anýar eskek esýmen on jyldan astam ýaqyt shuǵyldanady. Aıtýynsha, bul oǵan shydamdy ári myqty bolýǵa kómektesti, alǵa qoıǵan maqsattaryna jetýdi úıretti.
Anýar Akchýrın 2017-2019 jyldar aralyǵynda 1000, 500 jáne 200 metr qashyqtyqta respýblıkanyń birneshe dúrkin júldegeri dep tanyldy. Sondaı-aq qazaqstandyq jas sportshy – 2016 jylǵy Ózbekstanda ótken Azıa kýbogynyń birinshi oryn ıegeri, 2018 jyly Slovakıada uıymdastyrylǵan halyqaralyq regatanyń jeńimpazy, Bolgarıada 200 metr qashyqtyqta jastar arasynda ótken 2018 jylǵy álem chempıonatynyń kúmis júldegeri, Ózbekstannyń Samarqand qalasynda 500 jáne 200 metrge esýden 2018 jylǵy Azıanyń eki dúrkin chempıony.
Elordadaǵy fızıka-matematıka baǵytyndaǵy NIS-tiń 2018 jylǵy túlegi Anýar Akchýrın bıyl Florıda tehnologıalyq ınstıtýtyn «mechanical engineer» mamandyǵy boıynsha (AQSH) támamdap, jyl stýdenti atandy.