Almaty bazarynda bolǵan janjal kezinde 23 jastaǵy jigit zardap shegip, keıin aýrýhanada kóz jumdy, dep habarlaıdy Almaty-akshamy.kz Inform.kz-ke silteme jasap.
Kóz jumǵan jas jigit birneshe kún boıy Almatydaǵy aýrýhanalardyń birinde komada boldy. Eske salsaq, maýsym aıynyń ortasynda áleýmettik jelide 2 jigit janjalynyń vıdeosy tarady. Kadrda jas jigittiń belgisiz jannyń jaǵasynan alyp, urlanǵan telefondy qaıtarýdy suraǵan sáti kórinis tapqan. Sol kúni kúdikti qarsylasyn 2 ret uryp, oqıǵa ornynan qashyp ketken.
Oblystyq densaýlyq saqtaý basqarmasynyń habarlaýynsha, 20 maýsym kúni naýqas Almaty kópsalaly klınıkalyq aýrýhanasyna túsip, 8 shilde kúni tańerteń qaıtys boldy.
«Jedel-izdestirý sharasy barysynda polısıa qyzmetkerleri Jambyl oblysynyń týmasy 28 jastaǵy kúdiktini anyqtady. Qazirgi ýaqytta kúdikti Qarasaı aýdandyq polısıa basqarmasynyń ýaqytsha ustaý ızolátorynda qamaýda. Oǵan qatysty QR QK 192-baby 3-bóligi 1-tarmaǵy boıynsha tergeý júrip jatyr», - dep habarlady Almaty oblysy polısıa departamenti basshysynyń orynbasary, polısıa podpolkovnıgi Eldar Ábdikenov.
Tártip saqshylarynyń aıtýynsha, kúdikti qalaǵa jaqyn mańda jasyrynǵan. Qazirgi ýaqytta tıisti tergeý júrip jatyr. Onyń nátıjesi boıynsha qysqa merzimde is júrgizý sheshimi qabyldanady.