Prezıdentimiz basym baǵyttyń biri qylǵan týrızm men Almaty taý klasterin damytý búginde qalanyń turǵyndary men qonaqtarynyń arasynda taýda demalý mádenıetiniń qalyptasýyna túrki bolyp otyr.
Taý shańǵysy men snoýbordqa degen qyzyǵýshylyqtyń artýy, nusqaýshylardyń róli men ınfraqurylymnyń mańyzy týraly Shymbulak kýrortyndaǵy taý shańǵysy men snoýbord mektebiniń jetekshisi Nıkolaı Han Almaty qalasynyń Óńirlik komýnıkasıalar qyzmetine bergen suqbatynda aıtyp berdi, - dep habarlaıdy aqshamnews.kz.
1995 jyldan beri jumys isteıtin Shymbulak taý shańǵysy mektebi barynsha qaýipsiz qyzmet qurýǵa baǵyttalǵan birtutas júıeniń bir bóligi. Nıkolaı Hannyń aıtýynsha, byltyrdyń ózinde mektepte shamamen 30 myń sabaq ótipti. Qanshama bala men eresekter bilim alǵan osy ýaqyttyń ishinde. Talaı adam taý shańǵysymen de, snoýbordpen de alǵash osynda tanysypty.
Mektep jetekshisiniń aıtýynsha, Almatynyń taý klasteriniń damýy qysqy demalysty da kisi qyzyǵatyndaı ete túsýge sep bolady. Infraqurylym jaqsaryp, syrǵanaý men oqýǵa arnalǵan jańa múmkindik paıda bolyp, sonyń arqasynda belsendi demalysty tańdaıtyn adamdardyń sany da artyp keledi.
«Taý shańǵysy sporty qazir jattyǵý ǵana emes, ol úı-ishińmen kelip demalatyn úlken hobbıǵa aınaldy», — deıdi Nıkolaı Han da tolyqtyryp.
Maýsymnyń qyzǵan kezeńinde mektep kún saıyn 300–500 sabaq ótedi. Munda oqýǵa nıet bildirgen kez kelgen adamdy qabyldaı beredi. Balalar úsh jastan bastap oqıdy, eresekterdiń jas shamasyna shekteý joq eken.
«Meniń eń jasy úlken shákirtim 87 jasta boldy, eń kishkentaı oqýshym — ózimniń qyzym, oǵan alǵash ret 11 aılyǵynda shańǵy tebýdi úırettim. Durystap oqytsa, muny kez kelgen adam úırenip ketedi», — deıdi.
Mektepte qaýipsizdik máselesine erekshe kóńil bólinedi. Sabaqtyń barlyǵyn nusqaýshylar arnaıy daıyndalǵan oqý betkeılerde ótkizedi. Densaýlyǵynda kináraty bar adamdar aldyn ala dárigerge qaralyp alýy kerek eken.
«Qaýipsizdik birinshi turýy kerek», — deıdi Nıkolaı Han.
Onyń aıtýynsha, syrǵanaýǵa tóselip, trassada op-ońaı oıqastap júrý úshin 3–5 sabaq jetkilikti eken. Biraq joǵary deńgeıge jetý úshin úzbeı jattyǵý kerek. Týrıserdyń sany kóbeıip jatqandyqtan sóıtpeske amal joq. Sebebi oqyǵan adam oqys oqıǵaǵa tap bolyp, jaraqat alyp qalýdan aman júredi.
Taý klasteriniń damýy bilikti nusqaýshylarǵa degen suranysty da arttyrǵan. Olardyń sany kóbeıgenimen, suranys ilese almaı jatyr. Sondyqtan mamandardy daıarlaý men biliktiligin arttyrýǵa kóp kóńil bólinip otyr.
Nıkolaı Han balalarǵa, oqýshylar men stýdentterge arnalǵan baǵdarlamalar adamdy jastaıynan taýǵa jaqyn etip ósirip, qysqy sport túrine qyzyǵatyndardyń sanyn arttyrýǵa múmkindik beretinin aıtady.
«Bizdiń mekteptegi sabaq baǵasy format pen oqýshynyń sanatyna baılanysty. Mysaly, balalarǵa arnalǵan jeke sabaqtar 10 myń teńgeden, eresekterdiki 15 myń teńgeden bastalady. Toptyq sabaq arzanyraq. Bir adamǵa 8 myń teńgeden. Ádette qural-jabdyq sabaqtyń baǵasyna kirmeıdi, kýrorttaǵy jalǵa berý oryndarynan bólek alynady. Mektepte balalar men jasóspirimderdi taý shańǵysy sportyna tartýǵa baǵyttalǵan áleýmettik, mekteptik jáne toptyq baǵdarlamalar da bar. Bulardyń formaty men sharty maýsymǵa baılanysty ózgerýi múmkin», — dep túsindirdi Nıkolaı Han.
Aldaǵy 5–10 jylda Almatydaǵy taý klasteriniń damýy Shymbulak-ty halyqaralyq deńgeıdegi kýrortqa aınaldyryp, Qazaqstandaǵy taý shańǵysy sportyn buqaralyq sportqa aınaldyrýy tıis.
«Damyǵan ınfraqurylym men kásibı nusqaýshylar — týrızmniń turaqty damýyna negiz bolatyn úlken faktor», — dep túıindedi sózin Nıkolaı Han.