Konstıtýsıalyq komısıanyń ekinshi otyrysynda QR Ádilet mınıstri Erlan Sársembaev Negizgi zańǵa birqatar negizgi ózgeristerdi usyndy. Atalǵan ózgerister azamattardan, saıası partıalardan, qoǵamdyq uıymdar men sarapshylardan túsken usynystardy eskere otyryp ázirlendi, - dep habarlaıdy Aqshamnews.kz.
Atap aıtqanda, Úkimettiń, Konstıtýsıalyq sottyń, prokýratýra jáne sot bıligi organdarynyń jekelegen fýnksıalaryn, quqyq qorǵaý tetikterin, jergilikti ózin-ózi basqarýdy, jekelegen aýmaqtarda arnaıy quqyqtyq rejım belgileý qaǵıdattaryn, sondaı-aq Konstıtýsıaǵa ózgerister men tolyqtyrýlar engizý tártibin reglamentteıtin Konstıtýsıanyń bólimderi men baptaryna ózgerister engizý usynylady.
Túzetýlerdiń jeke blogy bolashaq bir palataly Parlamenttiń – Quryltaıdyń qyzmetine qatysty bolady. Mysaly, tóraǵany taǵaıyndaý, onyń depýtattyq korpýsyn qalyptastyrý tártibi jáne ózge de rásimdik jaǵdaılar aıqyndalady.
Erlan Sársembaevtyń aıtýynsha, Konstıtýsıaǵa ózgerister men tolyqtyrýlar engizý tártibiniń mańyzdylyǵyn eskere otyryp, tıisti reglamentteýshi normalardy jeke bólimge bólý usynylady.
Úkimet fýnksıalaryn reglamentteýdi ózgertý sheńberinde memlekettik baǵdarlamalardy bekitýdi, sondaı-aq memlekettik komıtetterge qatysty ókilettikterdi alyp tastaý usynylady. Atap aıtqanda, olardyń qyzmetin basqarý, aktileriniń kúshin joıý jáne toqtata turý.
«Memlekettik josparlaýdyń jańa júıesine sáıkes memlekettik baǵdarlamalar atalǵan júıeniń qujattary bolyp tabylmaıdy. Mundaı baǵdarlamalar qajettiligine qaraı ázirlenip, bekitiletin bolady», - dep atap ótti ádilet mınıstri.
Erlan Sársembaev Qazaqstanda 2021 jyldan bastap mamandandyrylǵan ákimshilik sottardyń engizilýi quqyq ústemdigi qaǵıdatyn nyǵaıtýdaǵy jáne memleket pen azamat arasyndaǵy naqty teńgerimdi qamtamasyz etýdegi mańyzdy qadam bolǵanyn eske saldy.
«Osyǵan baılanysty Konstıtýsıanyń tıisti babynda sot bıligi ákimshilik sot isin júrgizý arqyly júzege asyrylatynyn tikeleı kórsetý usynylady. Bul ákimshilik sottarǵa konstıtýsıalyq-quqyqtyq mártebe beredi, jarıa-quqyqtyq daýlarda azamattardyń quqyqtaryn qorǵaý kepildikterin arttyrady jáne qoǵamnyń sot bıligine senimin nyǵaıtady», - dep atap ótti mınıstr.
Jalpy, Erlan Sársembaevtyń aıtýynsha, engiziletin ózgerister memlekettik júıeniń tıimdiligin kúsheıtedi, ol tek qana jeke tulǵalardyń emes, jarıa bılik ınstıtýttarynyń sapasyna baılanysty bolady.
«Qoǵam úshin bul memlekettiń syrtqy nemese ishki jaǵdaılarǵa qaramastan dáıekti ári quqyqtyq turǵyda áreket etetinine boljamdylyq pen senimdilikti bildiredi. Áleýmettik mindettemeler oryndalýda, ekonomıkalyq prosester jalǵasýda, halyqaralyq mindettemeler saqtalýda», - dep qorytyndylady ádilet mınıstri.