Gýmanıtarlyq kómekti jınaý jumysyna 30-ǵa jýyq iri volonterlik uıymdar kirisken. Osy kezge deıin 300 keli gýmanıtarlyq kómek jınalypty. Bul týraly Óńirlik komýnıkasıalar qyzmetiniń brıfıńinde «QAMQOR CHARITY» qoǵamdyq qorynyń ókilderi málim etti, dep habarlaıdy Almaty-akshamy.kz.
Volonterler gýmanıtarlyq kómekti jınaýda almatylyqtardyń erekshe belsendiligin atap ótti. Gýmanıtarlyq kómekti jınaý týraly habarlama habarlana salysymen volonterlerge bul qaıǵyly jaǵdaıǵa beı-jaı qaramaıtyn kóptegen turǵyndar kelip, óz kómekterin usynǵan.
«Abaı oblysyndaǵy jaǵdaı eshkimdi beı-jaı qaldyrmady. Osyǵan baılanysty Almaty qalasynyń eriktileri men volonterlik uıymdary birlesip, gýmanıtarlyq kómek jınaý qoryn uıymdastyrdy. Deıturǵanmen, bul iste eń alǵashqylardyń biri bolyp bizdiń turǵyndar bastama kóterdi. Bizden kóptegen turǵyndar shyǵyp, kómek qolyn sozýǵa tilektestikterin bildirdi. Qazirgi ýaqytta Abaı aýdanynyń jergilikti turǵyndary, sondaı-aq, qyzmet mamandary alǵashqy qajettilik zattarymen tolyǵymen qamtamasyz etilgen. Biz Semeıdegi bas shtabpen únemi baılanystamyz jáne qosymsha qajetti zattar tizimin alyp otyramyz», - dedi «QAMQOR CHARITY» qoǵamdyq qorynyń tóraıymy Baǵdat Anarbaeva.
İri volonterlikk qozǵalystar qatarynda «Qazaqstan eriktileriniń lıgasy» QQ, «QAMQOR CHARITY» QQ, «Lider.kz» QQ, «Medısına jastary» RQQ jáne t.b. bar.
Almatyda gýmanıtarlyq kómek jınaý pýnkti 12 maýsymda jumys isteı bastady. Volonterler birinshi kezekte qajet bolatyn azyq-túlik pen zattardy qabyldap jatyr.
«Biz kómekti kestege sáıkes, tańǵy 10.00-den keshki 19.00-ge deıin qabyldaımyz. Bizdiń shtabta 20-dan astam volonter jumys isteıdi. Sońǵy eki táýlikte 300 keliden astam gýmanıtarlyq kómek jınaldy. Olardyń arasynda 8500 dana respıratorlyq maskany bizdiń «Lider.kz» volonterlik uıymy berdi. Sonymen birge, dári-dármek alynyp, úıge, jańa týǵan sábılerge qajet zattar, jeke bas gıgıenasyna qajet zattar da alyndy. Bul - bir kún ishinde jınalǵan kómektiń kólemi. Biz shtab jumysyn áli de jalǵastyramyz. Abaı oblysynda bolǵan qaıǵyly jaǵdaı bárimizdiń qabyrǵamyzdy qaıystyrdy», - dep bólisti volonter Abzal Áripov.
Atap ótetini, volonterler qarjylaı kómekti qabyldamaıdy. Qalaǵandar birinshi kezekte qajet bolatyn azyq-túlikti (konserviler, makaron jáne basqalary) jınap, bir ret qoldanatyn ydys, qýattaý quraldary, jeke bas gıgıenasyna qajet zattar, sý jáne t.b. jınaý pýnktterine ákelýlerine bolady.
Qazir turǵyndardy, kásipkerlerdi osy jumysqa tartý úshin aqparattyq jumystardy júrgizip jatyrmyz. Jalpy osy aptanyń sońyna deıin jınalǵan kómektiń alǵashqy júgin jiberýdi josparlap otyrmyz. Kómek qajettiligine qaraı jınalady. Buǵan deıin jınalǵan qorlar tájirıbesi kórsetkendeı, kómek jınaý bir aptaǵa deıin jalǵasady jáne odan keıin qajettiligi azaıady. Odan keıin de kómek qajet bolsa, biz jumysty jalǵastyramyz», - dedi B.Anarbaeva.
Volonterlerdiń qataryna qosylǵysy keletinder nemese gýmanıtarlyq kómek jınaýǵa atsalysqysy keletinder Baıtursynov kóshesi, 22, 1-korpýs, 1-qabat mekenjaıy boıynsha Almaty volonterleriniń front-keńsesine jolyǵýyna bolady. Nemese +7 747 821 64 78, +7 747 540 01 40, +7 771 625 77 76 sall-ortalyqtarynyń nómirlerine habarlasa alady.