Almaty Qalalyq jedel shuǵyl kómek kórsetý aýrýhanasynyń (QJSHKKA) travmatolog-ortopedteri 21 jasar naýqasty aıaqqa turǵyzdy.
Jedel járdem brıgadasy qatty aýrý sezimi, tirek fýnksıasynyń buzylýy jáne sol aıaqtyń deformasıasyna shaǵymdanǵan jas jigitti QJSHKKA qabyldaý bólimine jetkizdi. Naýqasty tolyq tekserýden keıin sol san súıeginiń ortańǵy úshten bir bóliginiń synyqtarynyń yǵysýy oryn alǵan jabyq synyq dıagnozy qoıyldy. Dárigerler shuǵyl ota jasaý týraly sheshim qabyldady, dep habarlaıdy Almaty-akshamy.kz.
Quramynda travmatolog-ortopedter Nursultan Ernazarov, Mádı Janatuly jáne Baǵlan Jıenalıev bar hırýrgıalyq brıgada naýqasqa sol jambas súıeginiń jabyq repozısıasy, BIOS otasyn jasady.
Buǵattalatyn ıntramedýllárlyq osteosıntez (BIOS) - súıek jaraqatyn shaǵyn ınvazıvti hırýrgıalyq emdeý ádisi. Mundaı ota kezinde synyq aımaǵy ashylyp kesilmeıdi, bul zaqymdalǵan súıektiń qanmen qamtamasyz etilýin saqtaýǵa múmkindik beredi jáne synyqtyń tez jazylý múmkindigin qamtamasyz etedi.
- Mundaı otanyń basty ereksheligi – ota tez jasalady, 30-40 mınýtqa sozylady. Ota jasalǵan aımaq kesilmeı, tek birneshe tesik jasalady. Sondyqtan jaranyń jazylýy tez, ári asqyný men irińdeý qaýpi óte tómen. Naýqas otadan keıin aıaqqa tez turady, tez saýyǵady. Súıek jaqsy jınalady, - dep túıindedi dáriger travmatolog-ortoped Nursultan Ernazarov.
Jarty saǵatqa sozylǵan ota sátti ótti. Otadan keıingi kelesi kúni naýqas baldaqmen júre bastady. Al jetinshi kúni turǵylyqty jeri boıynsha ambýlatorlyq emdeýge shyǵaryldy.