Almatyǵa búgin tańǵy saǵat 7-de Pfizer vaksınasynyń alǵashqy partıasy kelip, №7 Qalalyq klınıkalyq aýrýhanaǵa – 379 myń dozasy jetkizildi. Arnaıy temperatýrany saqtaýǵa múmkindik beretin 8 qoraptan 46 800 dana amerıkandyq vaksına qabyldandy. Ár komponent sáıkesinshe 23 400 danadan.
«Búgin tańǵy 7-de atalmysh vaksına aeroporttan Ortalyq vaksına qoımasyna qabyldandy. Osy jerden ekpe Almatynyń barlyq aýrýhanalaryna taratylatyn bolady. Vaksına temperatýranyń barlyq jaǵdaılaryn eskere otyryp ákelindi», - dedi Qalalyq klınıkalyq aýrýhananyń epıdemıologıalyq jaǵdaı men ınfeksıalyq baqylaý jónindegi dırektordyń orynbasary Elvıra Ibragımova.
Epıdemıologtyń aıtýynsha, barlyq qoraptar arnaıy temperatýra sezbegimen jabdyqtalǵan. Sezbek tasymaldaý barysynda bastan aıaq qosýly bolǵan. Olardyń jumysy tek ortalyq qoımada toqtatyldy. Erjege sáıkes ár qorap 5 mınýttyń ishinde ashylyp, vaksına tońazytqyshtarǵa salyndy.
Buǵan deıin preparatty odan ári saqtaý úshin Almaty qoımasyna arnaıy eki tońazytqysh alynǵan. Ondaǵy temperatýra – 60-90 gradýs aralyǵynda. Munyń barlyǵy ekpeniń nusqaýlarǵa sáıkes jetkizilgenin kórsetedi. Emhanalar vaksınany arnaıy termoqoraptarda qabyldap, +2 men+8 temperatýra aralyǵyndaǵy rejımde bir aı saqtaı alady.
Vaksınasıa eń aldymen medısınalyq nysandarda, keıin bilim berý ortalyqtarynda júretin bolady. Olardyń qataryna mektepter, joǵary oqý oryndary, orta bilim berý oryndary kiredi. Ekpeniń birinshi jáne ekinshi komponenti 21 kúnnen 28 kún aralyǵyndaǵy ıntervalmen salynady.
Pfizer vaksınasy erikti túrde:
12 jáne odan joǵary jastaǵy jasóspirimderge;
júkti áıelderge – júktiliktiń 16-dan 37-shi aptasyna deıin;
laktasıa kezindegi áıelderge – bosanǵannan keıingi kezeń aıaqtalǵannan keıin (42 kúnnen keıin) salynady.
Jalpy Qazaqstan arnaıy kelisim boıynsha Comirnaty Pfizer/BioNTech vaksınasynyń 4 mln-nan astam dozasyn satyp aldy. Qalǵan partıalar keste boıynsha apta saıyn elimizge jiberiletin bolady.