Almatyda Respýblıka kúnine oraı kınologıalyq is-shara — «Qazaqy tazy» mono tukymdy kórmesi jáne ulttyq dárejedegi Qazaqstan kınologtar odaǵynyń qýbogy ótip jatyr. İs-sharany «Qazaqstan kınologtar odaǵy» respýblıkalyq qoǵamdyq birlestigi uıymdastyrdy.
Qazaqstan kınologtar odaǵynyń prezıdenti Baýyrjan Serikqalıdiń aıtýynsha, qazaqy tazy — Qazaqstannyń mádenı murasy retinde tanylǵan erekshe tuqym. Al 2024 jyly Halyqaralyq kınologıalyq federasıa qazaq tazysyn aldyn ala ıt tuqymy retinde taný týraly sheshim qabyldady.
- Qazir biz sapaly tazylardyń sanyn kóbeıtýge arnalǵan baǵdarlama boıynsha durys kele jatyrmyz. Olardyń sany ósip keledi. Tazynyń halyqaralyq deńgeıde moıyndalýy - elimiz úshin mańyzdy oqıǵa. Endi ózge memleketter bul tuqymdy ózine ala almaıdy. Sondaı-aq dúnıejúzi tazy tuqymyn jaqsyraq tanı tústi, - dedi ol.
Mono tuqymdy kórmede elimizdiń ár óńirinen kelgen 60-tan astam tazy qatysyp jatyr. Baǵdarlama tazynyń tuqymyn jan-jaqty baǵalaýǵa baǵyttalǵan. Itter bekitilgen standarttarǵa sáıkes tekseriledi de, ulttyq jáne halyqaralyq sanattaǵy tóreshiler sheshimi boıynsha úzdikteri anyqtalady.
Kórmege arnaıy ıtterin qatystyryp otyrǵan Dáýren Jumaǵalıev tazynyń ereksheligi týraly aıtty.
- Oqýshy kezde atamyzdyń janynda júrip, onyń eki tazysyna qyzyǵatyn edim. Óse kele osy ispen aılanysa bastap, qazir 20 shaqty tazym bar. Minezderi ártúrli bolady - sabyrly, oıynqumar, qarýly, júırik jáne basqa da. Biraq eshqaısysynda suǵanaqtyq bolmaıdy. Aqyldy ári alǵyr, ıisi bolmaıtyn taza janýar. Adamdy tistemeıdi. Bóten adam kelse, úredi de uıasyna kirip ketedi - aqyldyǵy sonda. Sonymen qatar Tazyny baılap qoıýǵa bolmaıdy, kólikpen, atpen túzge shyǵaryp turý kerek. Júgirip tursa, babynda bolady. Bir orynda otyra berse, tez semirip, maıtaban bolady, - dedi Dáýren Jumaǵalıev.