«Marsqa sapar» sımfonıasynyń álemdik premerasy kórsetildi.
Jambyl atyndaǵy Qazaq memlekettik fılarmonıasynda jahan jurtynyń nazaryn aýdarǵan sımfonıanyń tusaýkeseri ótti. «Marsqa sapar» dep atalǵan halyqaralyq deńgeıdegi mádenı joba tyń ádisterdi tuńǵysh ret qoldanyp, álemdik jańashyldyq ornatty. Kópshilik kóz tikken premeranyń Qazaqstannyń mádenı astanasy Almatyda ótýi de atap óterlik jaıt, dep habarlaıdy Almaty-akshamy.kz Almaty.tv silteme jasap.
Alǵashynda premera Birikken Arab Ámirliginde ótedi dep josparlanypty. Oǵan basty sebep – «Marsqa sapar» mádenı jobasyn birneshe memlekettiń kompozıtorlary birigip jazǵan edi. Qazaqstan, AQSH, Ulybrıtanıa, Týnıs, Úndistan jáne Birikken Arab Ámirligi ónerpazdarynyń basyn qosqan keshtiń kórkemdik jetekshisi ári bas dırıjeri – belgili skrıpkashy, Almaty qalasynyń týmasy Marat Bısenǵalıev. Álemge áıgili vırtýozdyń arnaıy kelgenin ónersúıer kópshilik te qýana qabyldady. Ári atalǵan sımfonıa tusaýkeseriniń dál Almatyda ótýi de shahardyń shyraıy men álemdik sahnadaǵy mártebesin asqaqtata túskendeı.
«Myna premeranyń ashylýy ǵana emes, mýzykalyq janrlardyń, mýzykalyq effektilerdiń jańalyǵy dep aıtsaq bolady. Sebebi, myna jaqta mýzykalyq janr dep otyrǵanym, tórt kompozıtor bir sımfonıany jazdy degenniń ózi bul úlken jańalyq mýzyka áleminde. Al ekinshi jańalyǵymyz, biz alǵashqy bolyp álem boıynsha kvadroeffekt degendi qoldanaıyn dep jatyrmyz», – dedi Jambyl atyndaǵy Qazaq memlekettik fılarmonıasynyń dırektory Serik Nurmoldaev.
Al álemdik óner álemindegi vırtýoz dál osy is-sharanyń ózi týǵan arý Almatyda ótkenine qýanyshty. Jahan kompozıtorlarynyń shyǵarmashylyǵynan shyqqan dúnıe búgin mádenı astananyń aspanynda qalyqtaıdy deıdi skrıpkashy.
«Eger siz búgingi sımfonıany áleýmettik jeliden nemese telearna arqyly kóretin bolsańyz, bizdiń álem boıynsha alǵashqy bop qoldanǵan effektimizdi baıqaı almaısyz. Bul ǵajaıypty qulaqpen estip, júrekpen seziný kerek. Sondyqtan da «Marstaǵy mısıa» dep atap otyrmyz. Bul, rasynda, asa ǵajap dúnıe bolady», – deıdi vırtýoz-skrıpkashy, QR eńbek sińirgen qaıratkeri Marat Bısenǵalıev.
Sanıtarlyq talaptar eskerilgen keshte qonaqtardyń araqashyqtyq saqtaýy konsertti qoıýshylarǵa da asa tıimdi boldy. Sebebi, kvadroeffekt, ıaǵnı aýada áýenniń qalyqtaýy tikeleı zaldaǵy qurylymǵa qatysty edi. Al bas dırıjer Marat Bısenǵalıevtiń mýzykany kórermenderge qarap súıemeldeýi de sımfonıalyq premeradaǵy erekshelikterdiń biri boldy. Ár ónerpaz aıryqsha úles qosqan mýzykalyq týyndyǵa daıyndalý, árıne, qıynǵa soqpady.
Mýzykalyq baǵdarlamanyń ekinshi bóliginde tyńdarmanǵa áıgili aǵylshyn kompozıtory Karl Djenkınstiń týyndylary usynyldy. Sondaı-aq, ulttyq aspaptardyń súıemeldeýimen halyq ánderi de oryndaldy.
Aıta keteıik, atalmysh álemdik kesh tikeleı Almaty qalasy ákimdigi, sondaı-aq, Jambyl atyndaǵy Qazaq memlekettik fılarmonıasynyń qoldaýymen ótip otyr.