Respýblıkalyq jalpy ulttyq dıktant 2010 jyldan beri jyl saıyn ótkizilip keledi
Respýblıka kúni qarsańynda elimiz boıynsha mektep oqýshylary men kolej stýdentteri Otanǵa degen qurmet retinde patrıottyq dıktant jazdy, dep habarlaıdy Almaty-akshamy.kz.
Jalpy ulttyq dıktant búkil el boıynsha 17 qazan kúni, saǵat 10.00-de bastaldy. Respýblıkalyq patrıottyq dıktanttyń negizgi taqyryby – «Týǵan jer», «Bizdiń Otanymyz», «Rodnaıa zemlá». Dıktant qazaq jáne orys tilderinde alynýda.
Respýblıkalyq jalpy ulttyq patrıottyq dıktant Almaty qalasynyń barlyq kolejderi men mektepterinde de ótti. Atap aıtqanda, M.Maqataev atyndaǵy №140 gımnazıanyń 8-11 synyp oqýshylary, №1 Almaty qazaq memlekettik gýmanıtarlyq pedagogıkalyq koleji men «Almaty memlekettik servıs jáne tehnologıalar» kolejiniń stýdentteri dıktant jazýǵa qatysty.
Respýblıkalyq jalpy ulttyq dıktant 2010 jyldan beri jyl saıyn ótkizilip keledi. Gýmanıtarlyq pedagogıkalyq kolej dırektory Magıshat Tasqalıqyzynyń aıtýynsha, kolej stýdentteri dıktantty óte saýatty jazady.
Jalpy dıktant jazý jas urpaqtyń saýattylyǵyn arttyryp qana qoımaı, patrıottyq rýhyn da oıatady. «İs-sharany uıymdastyrýdaǵy basty maqsat – kolej tálimgerleriniń boıynda patrıottyq sezimdi oıatý jáne aldaǵy Respýblıka kúniniń mán-mańyzy túsindirý. Stýdentterimiz Júsipbek Aımaýytovtyń týǵan jer týraly keremet jazbasyn ózderi oqyp-jazýdyń arqasynda biraz tálim-tárbıeni boılaryna sińiredi dep oılaımyn», – dedi «Almaty memlekettik servıs jáne tehnologıalar» kolejiniń dırektordyń oqý isi jónindegi orynbasary Móldir Abdreımova.
Dıktanttyń eń basty taǵy ereksheligi – jas urpaqtyń ulttyq turǵydaǵy dúnıetanymyn keńeıtý de. Bul jóninde Almatydaǵy M. Maqataev atyndaǵy №140 gımnazıa basshysy Sánıa Óskenbaıqyzy bylaı dedi:
– Búgingi jazylǵan dıktanttyń eń basty ereksheligi – jas urpaqtyń respýblıka kóleminde, bir mezgilde ıaǵnı, 17 qazan kúni, saǵat 10.00 de bastalǵandyǵy. Meniń baıqaǵanym – tańdalǵan mátin de erekshe, patrıottyq sezimge tunyp tur. Máselen, ulttyq mektepterge Júsipbek Aımaýytovtyń «Qartqoja» romanynan úzindi berilgen eken. Shyǵarmanyń eń shuraıly, áserli jeri alynǵany kórinip tur. Sóz zergeri týǵan jerdiń taýy men tasyn, ózen-kóliniń baǵa jetpes sulýlyǵyn, kórkem tilmen sýrettegen. Tipti, tyńdap otyrǵan adamnyń tula-boıy shymyrlap ketedi. Onyń ústine qazaq tili men ádebıeti pániniń muǵalimderi de mátindi jáı ǵana oqyp bermeı, barynsha emosıonaldy túrde, obrazǵa enip, júrekke jetkize oqyp jatyr. Bul rette, barlyq oqýshylardyń da mátindi túsine otyryp, týǵan jerdiń tabıǵatyn, baǵa jetpes baılyǵyn kózben kórgendeı, kóńilge túıip otyrǵany anyq. Balalardyń dúnıe-tanymy, týǵan jerge degen qushtarlyǵy artta tústi dep oılaımyn. Bul bizdiń aldaǵy mártebeli merekege – Respýblıka kúnine tartýymyz. Eń bastysy, jastarymyz tanymdyq turǵyda keremet oı túıip, mol aqparat aldy. Óıtkeni bul dıktanttyń basty ereksheligi – patrıottyq taqyryptyń qamtylýy edi. Mektebimizdiń dıktant jazǵan 650-den astam oqýshysynyń boıynda shynaıy patrıottyq sezimniń qalyptasqany anyq.
Elimizdiń mártebeli merekesiniń qurmetine arnalǵan bul dıktanttyń qorytyndysy taldanyp, talqylanyp, qorytyndysy áleýmettik jelilerge jarıalanady.
