Almatyda aqyn, dramatýrg, Qazaqstan Memlekettik syılyǵynyń laýreaty, Eńbek sińirgen qaıratker Nurlan Orazalın N301 saılaý ýchaskesinde daýys berdi.
Aqyn búgingi saılaýda Qazaqstan halqy judyryqtaı jumylyp, óz konstıtýsıalyq quqyǵyn paıdalanýy kerek ekenin aıtty, dep habarlaıdy Almaty-akshamy.kz QazAqparatqa silteme jasap.
«Kez kelgen saılaýdyń tarıhı sıpaty bolady. Búgingi saılaýdyń basqa saılaýlardan jóni bólek. Sebebi, shynymen eger demokratıalyq qundylyqty baǵalaıtyn bolsaq qazir mol múmkindik berilip jatyr. Bul shyn maǵynasyndaǵy saılaýdyń jańa úlgisi dep baǵalaýymyz kerek. Qazir dúnıe júzi bizdiń elge qarap otyr. Sondyqtan Qazaqstan halqy judyryqtaı jumylyp, óz konstıtýsıalyq quqyǵyn durys paıdalanýy kerek dep esepteımin», - dedi Nurlan Orazalın.
Ol óz kóńilinen shyqqan partıa men el erteńi úshin eńbek etip júrgen azamattarǵa daýys bergenin jetkizdi.
«Men óz oıymda júrgen, kóńilimde júrgen oılarymdy aıtqan partıaǵa daýys berdim. Ony ózim bilemin. Al endi jalǵyz mandatty kandıdattardyń ishinde belgisiz azamattar kóp eken. Maǵan tańdaý qıyn boldy. Degenmen, olardyń arasynda eldiń erteńi úshin eńbek etip júrgen azamattar bar, men solarǵa daýys berdim. Bizdiń saqtanatyn bir nársemiz bar – ol jeń ushynan jalǵasyp ketpeı, shyn júırikterdi tańdaı bilsek, Jańa Qazaqstannyń alǵa qoıǵan maqsaty men muratyn oryndaımyz dep oılaımyn. Men Jańa Qazaqstan úshin, bolashaq urpaǵymyz myqty, tekti bolýy úshin daýys berdim», - dedi aqyn Nurlan Orazalın.