Búgin Almatyda QR UǴA akademıgi, Qazaqstan Respýblıkasynyń eńbek sińirgen ǵylym jáne tehnıka qaıratkeri Kópjasar Náribaevqa arnalǵan memorıaldy taqtanyń saltanatty ashylýy boldy. Eskertkish taqta ǵalymnyń 1985-2020 jyldar aralyǵynda turǵan úıiniń qabyrǵasyna ornatyldy. Saltanatty sharaǵa belgili qoǵam qaıratkerleri, ǵalymdar Kópjasar Náribaıulynyń týystary qatysty.
Búgin ol 85 jasqa tolar edi. Kópjasar Náribaev Qazaqstan Respýblıkasynyń qoǵam jáne memleket qaıratkeri, Qazaqstannyń Joǵary jáne orta arnaýly bilim mınıstri (1983-1987), Joǵarǵy Keńestiń depýtaty boldy. H jáne Hİ saılanǵan Qazaq KSR Keńesi, 10 jyl boıy ál-Farabı atyndaǵy QazUÝ-dy 1991-2001 jyldar aralyǵynda basqardy. Joǵary ǵylymı jetistikteri jáne kóptegen sheteldik ǵylymı jáne oqý oryndarymen halyqaralyq yntymaqtastyqty damytýdaǵy sińirgen eńbegi jáne birneshe halyqaralyq sheteldik ǵylym akademıalarynyń tolyq múshesi. 300-den astam ǵylymı eńbekteri, onyń ishinde 30 kitap pen monografıalar, 15 broshúralar shyǵarǵan.
Alǵashqylardyń biri bolyp sóz sóılegen belgili tarıhshy, QR UǴA akademıgi Mámbet Qoıgeldıev Kópjasar Náribaıulynyń jan-jaqty daryn ıesi ekenin aıta kelip, qyzmet atqarǵan jyldardaǵy eńbegine toqtaldy.
– Kóbeken sóz ónerine, ádebıet pen mádenıetke jaqyn, jan-jaqty daryn ıesi bolatyn, óleń jazatyny bar edi. Ol óz ómiriniń «1986 jylǵa deıin jáne odan keıingi kezeń» dep ekige bólinetinin aıtatyn. Sonyń eń jemisti kezeńi – ál-Farabı atyndaǵy QazUÝ rektory bolǵan ýaqyty. Men ol kezde QazUÝ-da tarıh fakúltetiniń dekanymyn. Qyzmet babymen kóp sóılesetinbiz. Sonda men onyń paıym men parasat ıesi, aqyl-oıdyń adamy ekenin túsindim. Sol tusta tulǵaly azamattyń shapaǵatyn bizdiń fakúltet bir kisideı-aq kórdi. Kóbekeń ǵajap tulǵa, naǵyz memleket qaıratkeri edi, – dedi tarıhshy.
Al Kópjasar Náribaevtyń shákirti, ári áriptesi, ekonomıka ǵylymdarynyń doktory, profesor Erjan Jatqanbaev birge qyzmet atqarǵan jyldardaǵy adamı qasıetteri jaıynda aıtty.
– Kóbekeń meniń tálimgerim boldy. Sol kisiniń arqasynda 20 jylda 46 ǵylym doktory men kandıdatyn daıyndadym. Rektor bolǵan kezinde QazUÝ-dyń aýmaǵyn saqtap qaldy, bul onyń óz isine degen adaldyǵy men jaýapkershiligin kórsetedi. Áriptesterin qatty qurmetteıtin, ujymdy baǵalaıtyn. Kópjasar Náribaev uıymdastyrýshylyq qabileti mol, joǵary bilimniń jaǵdaıyn jetik biletin, ǵylym áleminde óz bıigi men bedeli bar, parasatty tulǵa bolatyn. Ýnıversıtettegi atqarylǵan ıgilikti isterdiń basynda Kópjasar Náribaıuly turatyn, - dedi ol.
Eskertkish taqtanyń ashylý saltanatynan keıin Kópjasar Náribaevtyń uly Marat tilshilerge arnaıy suhbat berdi.
– Búgin otbasymyz úshin aıtýly kún. Eger kózi tiri bolǵanda búgin ákem Kópjasar Náribaev 85 jasqa tolar edi. Ol 1938 jyly 3 maýsymda dúnıege kelgen. Bizdiń otbasymyz 1985 jyldan beri osy úıde turady. Meniń jastyq shaǵym da osynda ótti. Lenın atyndaǵy Qazaq polıtehnıkalyq ınstıtýtynyń stýdenti bolyp, odan keıin eńbek jolymdy osynda bastadym... Bul úıde bizdi ákemizben baılanystyratyn jarqyn estelikter bar. Men úshin ákem kóp qyrly tulǵa. Ómirde, eńbekte úlgi. Ákemniń uıymdastyrýshylyq qabileti óte joǵary bolatyn. Áńgime aıtqanda sózdiń maıyn tamyzatyn. Oıyn tereńnen tolǵaıtyn, sózi sabyrly, jan edi. Keıde ákemmen birge is-sharalarǵa barǵanda onyń sóılegen sózderi men oı oramdaryn yqylaspen tyńdap, qyzyǵatynmyn. Ónerge, mýzykaǵa jany qumar edi. Kabınetinde ilýli turatyn dombyrasyn shertkendi jaqsy kóretin. Halyq mýzykasyn súıip tyńdaıtyn, plasınkalardyń úlken jınaǵy bar. Ol kitapty kóp oqıtyn, ásirese, túrli janrdaǵy kitaptar óziniń jeke kitaphanasynda kóp boldy. Ákemniń jáne bir qyry ol shynaıy dostyqtyq baǵasyn biletin. Dostary tym kóp bolmasa da, olar qýanyshta da, qaıǵyda da qasynan tabylatyn. Dastarhan basynda otyrǵanda qazaqsha, oryssha ánder aıtyp, kez kelgen otyrysty jandyryp jiberetin. Ákemniń óleń jazatyny da bar. Keıinnen 1986 jyly áıgili «Jeltoqsan oqıǵasynan» keıin qyzmetin paıdalanyp, joǵary oqý oryndarynda qazaq jastaryn shekten tys kóbirek oqytyp, basqa ult ókilderine zıan keltirdi degen aıyppen qyzmetinen bosatyldy. Sol kezde zardap shekken jastarymyzǵa arnap óleń jazdy, - dep eske aldy uly.