Qylmystyq top ózderin baqylaýshy organdardyń qyzmetkeri retinde tanystyryp, kásipkerlerden aqsha bopsalaǵan.
Almaty qalalyq prokýratýranyń mobıldik tobyna «Nur-Sultan Prom bezopasnost JSHS jumyskerleri ózderin tótenshe jaǵdaı organdarynyń qyzmetkerleri retinde tanystyrǵan bireýler aıyppul salý jáne tekserý júrgizýmen qorqyta otyryp, kásipkerlerdi órtke qarsy qaýipsizdik qyzmetteri úshin tólem júrgizýge májbúr etkendigi týraly habarlama túsken, dep habarlaıdy Almaty-akshamy.kz QazAqparatqa silteme jasap.
«Bul rette elimizde shaǵyn jáne orta bıznes sýbektilerin tekserýge 2023 jylǵa deıin moratorıı qoldanylatyny belgili. Alaıaqtar sózderiniń rastyǵy men dáleli retinde mazmuny jaǵynan memlekettik organdardyń kýálikterine uqsas qyzyl tústi qyzmettik kýálikterin kórsetken. Qadaǵalaý organy alaıaqtyq faktisi boıynsha sotqa deıingi tergep-tekserýge bastamashylyq etti»,- delinedi prokýratýra habarlamasynda.
Tergeý barysynda Almaty qalasynyń Naýryzbaı men Áýezov aýdandarynda 24 kásipker jábirlenýshi bolǵany anyqtaldy. Sondaı-aq, tergeýdiń bastapqy kezeńinde qylmys jasady degen kúdikpen 1991 jáne 1995 jyly týǵan eki adam ustalyp, sottyń sanksıasymen qamaýǵa alyndy. Keıin 1995 jyly týǵan kompanıa dırektory orynbasarynyń da qatysy bary anyqtaldy. Oǵan Qylmystyq kodekstiń 190-baby 3-bóliginiń 4-tarmaǵy negizinde, ıaǵnı, adamdar tobynda birneshe ret jasalǵan alaıaqtyq faktisi boıynsha aıyp taǵyldy. Atalǵan qylmys úshin jaza múlkin tárkileı otyryp, 7 jylǵa deıingi merzimge bas bostandyǵynan aıyrýdy kózdeıdi.
«Almaty qalasy Naýryzbaı aýdanynyń prokýratýrasy sotqa deıingi tergep-tekserý nátıjeleri boıynsha qaraý úshin qylmystyq isti sotqa joldady. Mundaı zańsyz is-áreketter bızneske qysymdy tómendetý boıynsha júrgizilip jatqan memlekettik sharalardyń bedelin túsirip, olarǵa nuqsan keltiredi. Almaty qalasynyń prokýratýrasy bıznes sýbektilerine +7-701-775-55-00 nomerine júginýge bolatyn kásipkerlerdiń quqyqtaryn qorǵaý jónindegi mobıldi toptyń turaqty jumysy týraly taǵy da eske salady», - dep habarlady qalalyq prokýratýrada.