Bir aptaǵa sozylǵan festıválge kórermen yqylasy erekshe boldy
Arý qala Almatyda II halyqaralyq «Isabekov álemi» atty teatr festıvali óz máresine jetti. Qazaqstan Respýblıkasynyń kórnekti jazýshy-dramatýrgi, Memlekettik syılyqtyń ıegeri Dýlat Isabekovtiń 80 jyldyq mereıtoıyna arnalǵan bul festıválge 6 teatr ujymy qatysty, dep habarlaıdy Almaty-akshamy.kz.
Jazýshynyń mereıli mereıtoıyna Qazaqstan Respýblıkasynyń Mádenıet jáne sport mınıstri Dáýren Abaev, Almaty qalasynyń ákimi Erbolat Dosaev jáne zıaly qaýym ókilderi qatysty.
Qalamger shyǵarmashylyǵyna erekshe yqylasyn bildirgen Memleket basshysy Qasym-Jomart Toqaevtyń Quttyqtaý hatyn Qazaqstan Respýblıkasynyń Mádenıet jáne sport mınıstri Dáýren Abaev oqyp berdi. Onda: «Qurmetti Dýlat Isabekuly! Sizdi mereıtoıyńyzben quttyqtaımyn! Halqymyz ózińizdi qazaq ádebıetiniń kósh kerýeni ilgeri basýyna súbeli úles qosyp kele jatqan kórnekti qalamger retinde jaqsy biledi jáne qadirleıdi. Sizdiń qalamyńyzdan shyqqan tartymdy týyndylar ulttyq rýhanı mádenı qazynamyzdy baıyta tústi. Shynaı ómirdi arqaý etken shyǵarmalaryńyz negizinde túsirilgen kórkem fılmder talǵamy bıik kórermenderdiń joǵary baǵasyna ıe boldy. Qazaq dramatýrgıasynyń órkendeýine sińirgen eńbegińiz de óte mol. Zamannyń tynys-tirshiligin aıshyqtap kórsete bilgen pesalaryńyz elimiz ben álem teatrlarynyń sahnalarynda turaqty qoıylyp keledi. Árdaıym ónegeli ómir jolyńyzben keıingi tolqynǵa úlgi kórsetip, qolǵa alǵan isterińiz sátti júzege asa berýine tilektestik bildiremin. Sizge zor densaýlyq, otbasyńyzǵa baq-bereke tileımin», delingen.
Festıvál barysynda Túrkıa, Grýzıa, Avstralıa jáne elimizdiń respýblıkalyq, oblystyq teatr ujymdary jazýshy shyǵarmalary boıynsha qoıylǵan spektáklderdi sahnalaýdan ózara saıysqa túsken bolatyn. Bir aptaǵa sozylǵan festıválge kórermen yqylasy erekshe boldy. Óner ujymdary jazýshynyń «Bórte», «Aktrısa», «Júz jyldyq mahabbat» jáne «Muragerler» syndy týyndylaryn sahnalady. Atalǵan sala maıtalmandarynyń sózinshe, qazaq dramatýrginiń eńbegine sheteldikterdiń qyzyǵýshylyq tanytýy beker emes.