Bul týraly Almaty qalasynyń ÓKQ alańynda esirtki qylmysymen kúres máseleleri jáne mundaı quqyq buzýshylyqtardyń aldyn alý sharalaryna arnalǵan brıfıń barysynda belgili boldy, dep habarlaıdy almaty-akshamy.kz
“Narkostop” jobasynyń jetekshisi Nurjan Jakýpovtyń aıtýynsha, kıbervolonterdiń mindeti – tyıym salynǵan preparattardy jarnamalaý belgileri bar siltemeler men habarlandyrýlardy anyqtaý jáne bul aqparatty quqyq qorǵaý organdaryna berý.
«Damyǵan tehnologıa dáýirinde esirtkiniń taralýy, onyń ishinde áleýmettik jeliler arqyly da oryn alýda. Tipti Facebook jelisinde esirtki satatyn dúkenniń jarnamasy bar skrınshottardy bizge jibergen bolatyn. Qazir ártúrli saıttar arqyly jastardy esirtkini taratýǵa tartý jaǵdaılary jıi kezdesedi. Bul qalaı bolady? Aldymen aılyǵy joǵary kýrer jumysyna habarlandyrý ilinedi. Ádette mundaı bos jumys oryndary stýdentterge qolaılyraq. Jumys berýshimen baılanys ornaǵan soń, esirtki dúkenderiniń kýratorlary jumystyń máni kýrerdiń ádettegi jumysynan sál ózgeshe ekenin jáne bul esirtkiniń taralýyn qamtıtynyn aıtady. Sosyn jumysqa polısıa aralasady, olar óz kezeginde tergeý júrgizip, quqyq buzýshylardy jaýapqa tartady», - dedi ol.
Bolashaq kıber-volonterlerge arnalǵan kýrsty ázirleýshilerdiń aıtýynsha, bul úshin arnaıy daǵdylar qajet emes. Kıber-volonter bolý úshin “Narkostop” jobasynyń áleýmettik jelidegi @narkostopkz paraqshasyna jazsańyz bolǵany.
«Kýrsta oqý qysqa merzimde ótedi. Bul jumys belgili bir ýaqytty bólýdi talap etpeıdi, adam belgili bir siltemelerdi baqylap, anyqtaýǵa 5-10 mınýt nemese 2-3 saǵat bóle alady. Al biz óz kezegimizde alynǵan aqparatty ári qaraı tergeý úshin quqyq qorǵaý organdaryna jiberemiz», - dedi N.Jaqypov.
Jastar arasynda esirtki qylmysynyń aldyn alý sharalaryna qatysty “Narkostop” jobasynyń volonterleri Almaty polısıasymen birlesip, birqatar is-sharalar ótkizýde. Qala qabyrǵalaryndaǵy jarnamalardy boıaýmen qatar, mektep oqýshylary, kolej jáne ýnıversıtet stýdentteri men olardyń ata-analary úshin arnaıy dárister ótkiziledi. Osy jáne basqa da kóptegen sharalarǵa 3000-nan astam adam qatysty.
“Bıyl polısıa departamentimen birlese otyryp, 100 myńnan astam qabyrǵalardaǵy jarnamany boıadyq. Osyǵan uqsas 200-den astam is-shara ótkizildi. Sonymen qatar, biz ınternette jáne teledıdarda esirtkige qarsy kontent daıyndadyq. Qazaq tilinde esirtkiniń zıany týraly aqparat az ekenin eskerip, osy máselege kóńil bóldik», - dep atap ótti “Narkostop” jobasynyń jetekshisi.
Óz kezeginde Almaty qalasy Polısıa departamentiniń esirtki qylmysyna qarsy is-qımyl Basqarmasynyń aǵa jedel ýákili, polısıa maıory Kóbeev Dáýren habarlaǵandaı, qalada josyqsyz farmasevtter arasynda izdestirý sharalary júrgizilýde.
«Osy aptada medısınalyq, esirtkilik, psıhotroptyq zattardyń, sondaı-aq prekýrsorlardyń taralýyn boldyrmaýǵa baǵyttalǵan «Dármek» oqý-óndiristik is-sharalary ótkizilýde. Jedel izdestirý sharalary farmasevtıkalyq baqylaý qyzmetimen birlesip júrgiziledi. Sondaı-aq, aǵymdaǵy jyldyń naýryz aıynda «tramadol» dári-dármektiń jıyntyq kestesine engizilgenin, ıaǵnı tegin alýǵa bolatynyn, tipti dárigerdiń reseptimen ony jaı ǵana satýǵa bolmaıtynyn atap ótken jón», - dep túıindedi sózin D.Kóbeev.