Murjaı-úıiniń alańy 114,6 sharshy metrdi quraıdy.
Almatyda qazaq ádebıetiniń klassıgi Ǵabıt Músirepovtiń murajaı-úıi kúrdeli jóndeýden ótti. Reekspozısıa jazýshynyń 120 jyldyǵy qarsańynda iske asty, dep habarlaıdy Almaty-akshamy.kz.
Kúrdeli jóndeýden, modernızasıadan jáne reekspozısıadan keıin Ǵabıt Músirepov murajaıy elimizdegi alǵashqy zamanaýı mýltımedıalyq ádebı ortalyqqa aınalady. Rekonstrýksıa jáne reekspozısıa boıynsha júrgizilgen keshendi jumys jyl saıyn murajaıǵa kelýshiler sanyn eki esege – 22 myń adamǵa deıin arttyrýǵa múmkindik beredi dep josparlanýda.
Murajaıdy jańartý jumystaryna mýzeı jáne arhıv isi salasyndaǵy jetekshi mamandar, dızaınerler, sýretshiler, beıneınjenerler jáne t.b. tartyldy.
Jóndeý barysynda murajaı zamanaýı qural-jabdyqtarmen, onyń ishinde aqparattyq stendtermen, mýltımedıalyq júıemen, kontentti sensorlyq basqarýy bar proeksıamen, mýltımedıalyq tach-paneldermen jáne t.b. jabdyqtaldy. Bularda qundy ádebı derekter, muraǵattyq materıaldar, onyń ishinde «Beseýdiń haty», qoljazbalar, fotosýretter jáne t.b. kórsetiledi.
Reekspozısıa nátıjesinde ádebı zal qaıta jasaqtaldy. Stendterde jazýshynyń otbasy, balalyq shaǵy, bilimi, ádebı joldyń bastalýy jáne t.b. týraly málimetter keltirilgen ómiri men shyǵarmashylyq joly usynylǵan. Murajaıda sondaı-aq Ǵabıt Músirepov jazǵan, onyń ishinde «Amangeldi», «Qyz Jibek», «Bir ret jáne ómir boıy», «Qaýyn» fılmderin kórsetý úshin arnaıy kınozal ashyldy.
Eske salsaq, Ǵabıt Músirepovtiń sońǵy 18 jyl turǵan páteri 1991 jyly QR Ortalyq memlekettik mýzeıiniń bir bóligi retinde murajaıǵa aınalǵan. 1999 jyldan bastap nysan S.Muqanov pen Ǵ.Músirepovtyń memlekettik ádebı-memorıaldyq murajaı kesheni bolyp qaıta quryldy. 2015 jyldan bastap murajaı «Almaty qalasy mýzeıler birlestigi» KMQK quramynda.
Ǵ.Músirepov murjaı-úıiniń alańy 114,6 sharshy metrdi quraıdy. Eki memorıaldyq bólme, bir ádebı zal bar. Memorıaldyq bólmedegi zattar (jazý ústeli, kitaphana, jeke tutyný zattary, syılyq zattary jáne t.b.) burynǵy kúıinde saqtalǵan.
