Kúdikti ýaqytsha ustaý ızolátoryna qamaldy.
Almatyda er adam qarýmen qorqytyp, dúken tonaǵan, dep habarlaıdy Almaty-akshamy.kz.
İİM saıtynyń málimetinshe, qalanyń Bostandyq aýdanynda túngi saǵat birde dúken tonaldy.
«Rozybakıev kóshesinde ornalasqan táýlik boıy jumys isteıtin azyq-túlik dúkenine belgisiz bireý klıent retinde kirip, qarý qoldanyp, kasadaǵy aqshany urlap ketken. Kúzetshi men kasır óz ómirleri úshin qaýiptenip, tonaýshynyń talabyn oryndap, túsken aqshany berdi. Bul qylmysty ashý maqsatynda krımınaldyq polısıanyń tájirıbeli jedel qyzmetkerlerinen jáne aýdandyq PB-nyń tártip saqshylarynan arnaıy jedel izdestirý toby quryldy. Bir táýlikten keıin polısıanyń arnaıy jasaǵynyń kómegimen kúdikti qolǵa tústi. Onyń jumys ornynda, daıashy bolyp jumys isteıtin dámhanalardyń birinde, qyzmetkerlerge arnalǵan kıim aýystyratyn bólmede zattaı aıǵaq saqtalǵan sómke tabyldy, atap aıtqanda, ottyq túrinde jasyrylǵan myltyq, kúdiktiniń tonaý kezinde kıgen kıimderi men basqa da quraldar», – dep habarlady Almaty qalalyq polısıa departamenti bastyǵynyń orynbasary Dıdar Ahanov.
Tájirıbeli qaraqshy – Shymkent qalasynyń turǵyny, 24 jastaǵy T.esimdi azamat bolyp shyqty. Almatyda ol tabys tabý úshin júrgen jáne tájirıbe kórsetkendeı, bul tabystar kóbinese qylmystyq sıpatta bolǵan.
«Onyń azyq-túlik dúkenderine jasalǵan taǵy eki qaraqshylyq shabýylǵa qatysy bar ekendigi anyqtaldy. Qylmystardyń qoljazbasy birdeı. Saraptama júrgizý ústindemiz. Kúdikti ýaqytsha ustaý ızolátoryna qamaldy», – dedi Dıdar Ahanov.