Jeńimpaz 5 mln teńge alady.
Qala kúni qarsańynda aýla aýmaǵyn úzdik kógaldandyrý baıqaýynyń bastalǵany týraly aıtyldy, dep habarlaıdy Almaty-akshamy.kz. Bul týraly Almaty qalasynyń ákimi Baqytjan Saǵyntaev óziniń Twitter-degi paraqshasynda jazdy.
«Qala kúni qarsańynda aýla aýmaǵyn úzdik kógaldandyrý baıqaýynyń bastalǵany týraly habarlandy. Turǵyn úı ıeleri birlestikteriniń ókilderi, sondaı-aq qala turǵyndary ecovid.kz saıtynda ótinim bere alady. Jeńimpaz 5 mln teńge alady», - dedi Baqytjan Saǵyntaev.
Almatyda qala kúnine oraı «Aýla aýmaǵyn úzdik kógaldandyrý - 2021» baıqaýy jarıalandy. Jeńimpazǵa aýlany kógaldandyrýǵa qajetti qural-saıman, ósimdikter satyp alýǵa 5 000 000 teńge kóleminde sertıfıkat tabystalady.
Baıqaý aýlalardy abattandyrý jáne kógaldandyrýǵa, turǵyndardyń áleýmettik belsendiligin baǵalaý úshin jáne ekologıalyq ahýaldy jaqsartý úshin uıymdastyrylyp otyr.
Baıqaýǵa turǵyndar, menshik ıesi uıymdary men páter ıeleri kooperatıvteri qatysa alady. İs-shara aýlany kógaldandyrý jáne abattandyrý jumystaryna qala turǵyndarynyń nazaryn aýdarý maqsatynda uıymdastyrylǵan. Sonymen qatar, uıymdastyrýshylardyń aıtýynsha, qalanyń jasyl jelegine kóńil bólý máselelerine de mán berilýde.
Jumystardy baǵalaý kezinde olardyń mádenı-estetıkalyq, tájirıbelik, jańashyldyq erekshelikterine nazar aýdarylady. Baıqaýǵa qatysý úshin www.ecovid.kz saıtynda tirkeýden ótip, ótinish qaldyrý qajet. Marapattaý saltanaty Qala kúni — 19 qyrkúıek kúni ótedi.