Almatyda alǵash ret júkti áıelge júrekke rentgen sáýlesin qoldanbaı endovaskýlárlyq ota jasaldy.
Biregeı otany Qalalyq kardıologıa ortalyǵynyń dárigerleri Astanadaǵy UMC júrek ortalyǵynyń mamandarymen birlesip ótkizdi.
Densaýlyq saqtaý mınıstrliginiń habarlaýynsha, júktiliktiń 23-aptasynda júrgen áıelge jasalǵan. Dárigerler týa bitken júrek aqaýyn ehokardıografıanyń kómegimen, rentgensiz jáne jergilikti jansyzdandyrýmen emdedi. Bul ana men uryqqa rentgen sáýlesiniń áserin tolyqtaı boldyrmady.
Naýqas tuńǵysh sábıin kútip júrgen jáne tirkelgen emhanasynda kardıologtyń turaqty baqylaýynda bolǵan. Alaıda júktilik merzimi ulǵaıǵan saıyn júrek-qan tamyrlaryna túsetin júktemeniń artýyna baılanysty jaǵdaıy nasharlap, ota qajet bolǵan.
Operasıalyq brıgadanyń quramynda UMC júrek ortalyǵynyń ıntervensıalyq kardıology Erik Otarbaev, sondaı-aq Qalalyq kardıologıa ortalyǵynyń mamandary — Orazbek Sahov pen Baýyrjan Aıpov boldy.
— Operasıanyń basty ereksheligi rentgen sáýlelerin qoldanbaı últradybystyq baqylaýmen aralasý boldy. Qalypty tájirıbede mundaı operasıalar júktilik kezinde uryqqa yqtımal qaýip tóndiretin rentgendik baqylaýmen jasalady. Últradybystyq navıgasıany qoldaný radıasıalyq júktemeni tolyǵymen alyp tastaýǵa jáne ana úshin de, bolashaq bala úshin de qaýipsizdikti qamtamasyz etýge múmkindik berdi, - delingen habarlamada.
Vedomstvonyń málimetinshe, qazirgi ýaqytta naýqastyń jaǵdaıy turaqty. Ana men uryqtyń ómiri men densaýlyǵyna qaýip joq.