6 qyrkúıek kúngi saǵat 9:00-degi jaǵdaı boıynsha 302159 respondent onlaın sanaqtan ótti. Olardyń 271066-sy sanaq.gov.kz saıtynda, 25669 Egov portalyndaǵy saıt siltemesin paıdalana otyryp jaýap berse, 5424 adam sanaqqa Aitu qosymshasy arqyly qatysty, dep habarlaıdy almaty-akshamy.kz Ulttyq statısıka búrosynyń baspasóz qyzmetine silteme jasap.
Alǵashqy bes kúnniń qorytyndysymen megapolıster alǵa shyǵyp otyr. 46480 astanalyq turǵyn sanaqtan ótkeni jaıly habarlama alǵan. Onlaın sanaqtan ótken taǵy 43690 adam Almatyda tirkelgen. Úzdik úshtikti Shymkent túıindedi. Munda 40791 adam sanaq saýaldaryna jaýap berdi. Bul kórsetkish boıynsha ázirge sońǵy eki oryndy Mańǵystaý jáne Atyraý oblystary enshilep tur.
Bul óńirlerde sáıkesinshe 3350 jáne 2542 adam sanaqtan ótipti. Azamattardan sanaq kezinde alynǵan barlyq aqparattar Ulttyq statısıka búrosynyń ortalyq serverine jiberiledi.
USB-nyń aqparattyq júıesi aqparattyq-kommýnıkasıalyq ınfraqurylymdardyń asa mańyzdy nysandarynyń tizimine engizilgen jáne QR UQK «Memlekettik tehnıkalyq qyzmet» AQ-nyń taldaýyna alynǵan. Sondaı-aq, sanaq qarsańynda aqparattyq júıeniń aqparattyq qaýipsizdik talaptaryna sáıkestigi synaqtan ótkizilip, ol boıynsha oń nátıje alynǵan bolatyn.
Arnaıy sanag.gov.kz saıtynyń qorǵanyshy retinde server men qoldanýshy arasyndaǵy aqparat almasý https hattamasymen qorǵalǵan, álemdegi iri sertıfıkattaý ortalyqtarynyń biri - Sectigo SSL-sertıfıkaty alyndy.
Ulttyq statısıka búrosy azamattardyń belsendiligi úshin alǵys aıta otyryp, sanaqty onlaın ótýge shaqyrady. sanaq.gov.kz saıty 15 qazanǵa deıin táýlik boıy qoljetimdi bolmaq. Onlaın sanaqtan ótpegender 1-30 qazan aralyǵynda ıntervúerlerdiń saýaldaryna jaýap bere alady. Barlyq saýaldar boıynsha 1446 baılanys ortalyǵyna habarlasýǵa bolady. Qońyraý shalý tegin.