Qazaq óneriniń kıeli qara shańyraǵy – Muhtar Áýezov atyndaǵy Ulttyq akademıalyq drama teatrynyń akterleri ujym bolyp ekpe salǵyzdy.
Búginde qalamyzda koronavırýs indetiniń des bermeı turǵany barshamyzǵa aıan. Bul rette COVID-19-ǵa tótep beretin birden-bir jol vaksına ekenin aıtqan akterler teatrdyń 96-maýsymynyń shymyldyǵyn ashýǵa daıyn ekenderin jetkizdi. Sondaı-aq, byltyr ujymdaǵy keı akterlerdiń osy bir qaterli indetke shaldyqqanyn aıtyp, sol kúnderdiń qaıtalanbaýyn tileıdi. Sonymen qatar, teatr ujymy túrli qaýeset áńgimelerge qulaq túrmeı, ekpe ektirý keregin aıtyp otyr.
«Bul indet sahna ónerine de zıanyn tıgizdi. Biz eki jylǵa jýyq birde jabylyp, birde ashylyp, belgili bir shekteýlermen jumys istep, bylaısha aıtqanda, kórermenderimizben ara qatynasymyz qyl ústinde turǵandaı jaǵdaıdy bastan keshirdik. Karantındik rejım jeńildegen soń, teatr ujymynyń barlyq akteri ekpe salǵyzdy. Ujymnyń 90%-y ekpeniń eki komponentin de aldy. Qazirgi tańda densaýlyǵymyz birqalypty, aýrý-syrqaýdan amanbyz, – deıdi M.Áýezov atyndaǵy Qazaq ulttyq drama teatrynyń dırektory Erkin Jýasbek.
Jaqyn arada kórermenge esigin aıqara ashatyn óner ıeleri tyń týyndylarymen daıyn otyr. «Osy jazda ujymdasqan túrde eńbek demalysyna shyqtyq. Kúz mezgilinen bastap óz jumysymyzǵa kiriskeli jatyrmyz. Karantın talaptary jeńildeı bastaǵandyqtan, basqa qalalarǵa gastróldik saparǵa, jańa spektáklderge tolyqqandy daıyndyq júrgizip jatyrmyz. Bizdiń ómirimiz kórermenderimizben mándi. Ózderińizben qaıta qaýyshatynymyzǵa qýanyshtymyz. Bir-birimizdiń, aınalamyzdyń amandyǵy úshin barsha otandasymdy ekpe alýǵa shaqyramyn», – deıdi Erkin Jýasbek.