QazaqGaz Almatydaǵy JEO gaz ınfraqurylymyna aýystyrý jumystarynyń birinshi kezeńin aıaqtady
Almaty energokeshenin gazǵa aýystyrý jónindegi Memleket basshysynyń tapsyrmasyna sáıkes, «QazaqGaz «UK» AQ-nyń enshiles kompanıasy – «Intergaz Ortalyq Azıa» uıymy gaz ınfraqurylymy qurylysynyń birinshi kezeńin aıaqtady.
Birinshi kezeńge eki avtomattandyrylǵan gaz taratý stansıasynyń qurylysy jáne «Almaty-Baıserke-Talǵar» jáne «Qazaqstan-Qytaı» magıstraldyq gaz qubyrlaryn biriktiretin TİR-04 jalǵastyrǵysh qubyrlary kirdi. Sonymen birge, Batys jylý kesheni Avtomattandyrylǵan gaz taratý stansıasyna jóndeý jáne qalpyna keltirý jumystary júrgizildi.
Avtomattandyrylǵan gaz taratý stansıasyn jáne jalǵastyrǵysh qubyrdy (TİR-04) iske qosýǵa arnalǵan is-sharaǵa Almaty qalasy ákiminiń orynbasary Asqar Amrın «Samuryq-Qazyna» AQ Strategıa jáne aktıvterdi basqarý jónindegi basqarýshy dırektory Eljas Otynshıev, Almaty oblysy ákiminiń orynbasary Nurjan Qudaıbergenov jáne «QazaqGaz «UK» AQ Basqarma tóraǵasy Sanjar Jarkeshov qatysty.
«Almaty JEO úshin gaz ınfraqurylymy qurylysynyń birinshi kezeńi aıaqtaldy. Bul Memleket basshysynyń Almaty Jylý elektr ortalyǵyn gazǵa kóshirý jónindegi tapsyrmasyn iske asyrýdaǵy alǵashqy qadam. 2030 jylǵa deıin qalanyń ónerkásiptik jáne jeke sektorlardaǵy nysandary gazdandyrylady. Tıisti jobalar qalany damytý baǵdarlamasynda jáne Almatynyń jańartylǵan Bas josparynda qamtylǵan», - dep atap ótti Almaty ákiminiń orynbasary Asqar Ámrın.
Avtomattandyrylǵan gaz taratý stansıasy 2-shi Jylý elektr ortalyǵyn tabıǵı gazben qamtamasyz etýge arnalǵan. Olardyń ónimdiligi 250 jáne 150 myń m3/saǵ quraıdy.
«Memleket basshysy Qasym-Jomart Toqaev Samuryq-Qazyna qory, QazaqGaz ulttyq kompanıacy men Almaty qalasynyń ákimdigine atalǵan jobany jedeldetýdi tapsyrǵan bolatyn. Jalpy, elimizdiń energetıka salasy, Almaty qalasynyń ekologıasy, orta jáne shaǵyn bıznesi úshin óte mańyzdy joba dep aıtsam qatelespeımin. Almaty qalasynyń ındýstrıaldyq aımaǵynda ornalasqan bıznes sýbektilerine úlken kómek bolady»,-dedi «Samuryq-Qazyna» AQ Strategıa jáne aktıvterdi basqarý jónindegi teń basqarýshy Eljas Otynshıev.
Sondaı-aq «Qazaqstan-Qytaı» magıstraldy gaz qubyry men «Almaty-Baıserke-Talǵar» magıstraldy gaz qubyry arasyndaǵy TIP-04 jalǵastyrǵysh gaz qubyry Almaty Jylý elektr ortalyǵyn ǵana emes, sonymen birge Almaty jáne Almaty oblysynyń turǵyndaryn da turaqty gazben qamtamasyz etýge múmkindik beredi. Gaz qubyrynyń jalpy uzyndyǵy – 9,6 km, ónimdiligi-1000 myń m3/saǵ.
«Memleket basshysynyń tapsyrmasy boıynsha QazaqGaz merziminen buryn Almaty Jylý elektr ortalyǵyn gaz ınfraqurylymyna aýystyrý jumystarynyń birinshi kezeńin aıaqtady. Budan bólek, Jylý elektr ortalyǵyn gazǵa kóshirý jumystarynyń kelesi kezeńine ótý úshin «Almaty-Baıserke-Talǵar» magıstraldyq gaz qubyrynyń ekinshi jelisin salýǵa kirisip jatyrmyz», – dedi QazaqGaz basshysy.
Budan bólek, «Batys Jylý kesheni» Avtomattandyrylǵan gaz taratý stansıasy «Almaty» ındýstrıalyq aımaǵynda iri ónerkásiptik jáne óndiristik bıznes-jobalardy iske asyrý úshin gaz jetkizýge múmkindik berdi.
«Batys Jylý kesheni» Avtomattandyrylǵan gaz taratý stansıasynyń qurylysyn 2016 jyly jeke merdigerlik uıym júrgizgen, biraq sol kúıi paıdalanýǵa berilmegen. 2023 jyly «QazaqGaz «UK» AQ atalǵan olqylyqty joıyp, atalǵan stansıany óz qarajaty esebinen jańǵyrtty. AGTS-tyń ónimdiligi 140 000 m3/saǵ quraıdy, onyń ishinde stansıanyń eki jelisi – Almaty turǵyndaryna saǵatyna 90 000 m3 jáne ındýstrıalyq aımaqqa saǵatyna 50 000 m3 gaz taratady.
«Búgingi kún Almaty qalasy men Almaty oblysy turǵyndary úshin mańyzdy kún! Memleket Basshysy Qasym-Jomart Kemeluly Toqaevtyń óńirlerdi gazdandyrý jónindegi tapsyrmasynyń aıasynda Almaty qalasynyń ekinshi jylý elektr ortalyǵyna arnalǵan avtomatty gaz taratý stansıasy (AGRS «TES-2») qurylysynyń aıaqtalýy barlyǵymyzǵa ortaq sátti qadam dep sanaımyn. Almaty oblysynyń Qarasaı, İle, Talǵar aýdandarynda ornalasqan jylý elektr ortalyqtaryn kógildir otynǵa aýystyrý, oblysymyzdyń birneshe eldi mekenderiniń ekologıasyn jaqsartyp, birqataryn gazben qamtyıtyn bolady. Atalǵan joba sonymen qatar «G4 City» jobasy aıasynda salynatyn qalany gazben qamtamasyz etedi»,-dep atap ótti Almaty oblysy ákiminiń orynbasary Nurjan Qudaıbergenov.
Atap óterligi, Almaty JEO jańǵyrtý jobasyn «Samuryq-Energo» AQ júzege asyrýda. QazaqGaz kompanıasy gaz ınfraqurylymyn salýmen aınalysady. Atalǵan joba – qaladaǵy jáne qala mańyndaǵy eldi-mekenderdegi aýanyń lastanýyn azaıtý arqyly Almaty turǵyndarynyń ómir sapasyn jaqsartýǵa baǵyttalady, sondaı-aq energıa tapshylyǵyn joıýǵa serpin beredi.