Olar jol jıegindegi trotýarlardy janaı nemese onyń ústine salynǵan kafe men dúkenderdi sýretke túsirip, mekenjaılaryn jarıalaýda.
Osylaısha ózekti máselege tıisti organdardyń nazaryn aýdarǵylary keledi. Sebebi jaıaý júrginshiler kólik jolymen júrýge májbúr. Joǵalǵan trotýardy jergilikti bılik joqtamaǵan soń, turǵyndar áleýmettik jeli arqyly jaýaptylardy izdeı bastady. Qala turǵyny Galına Svırıdovanyń bastamasyn ózge turǵyndar da qoldap, shahardyń ár jerindegi zańsyzdyqtardy jipke tizip jatyr, dep habarlaıdy Almaty-akshamy.kz 24.kz-ke silteme jasap.
«Jolǵa qatysty kez kelgen talap adamdardyń qaýipsizdigi úshin jasalǵan. Sol talap boıynsha trotýardyń eni saqtalýy kerek. Bizde ókinishke oraı, mundaı zań qadaǵalanbaıdy. Sondyqtan kóptegen kóshelerde trotýarlar joq. Olar buryn bolǵan, qosymsha qurylys salynyp ketken», - deıdi qala turǵyny Galına Svırıdova.
Almatylyqtar zań talaptaryna salǵyrt qaraǵan mekemelerdi tekserý kerektigin aıtady. Al óńirlerdegi jer ınspeksıalaryna jaýapty Aýyl sharýashylyǵy mınıstrliginiń málimetinshe, Kásipkerlik kodeksiniń 144-babyna sáıkes, kásipkerlerdi turǵyndardan jazbasha aryz túspeıinshe tekserýge bolmaıdy.
«Jeke kásipkerlerdi ákimshilik jaýapkershilikke, ashyǵyn aıtqanda, jaýapkershilikke tartý múmkin emes. Moratorııǵa baılanysty qandaı kásipker bolsa da, biz baryp, jumysyn teksere almaımyz. Iaǵnı bul jerde ol qazir kósheniń boıynda tur ma nemese onyń jarty metri me nemese tolyǵymen trotýardy jaýyp aldy ma degen sekildi másele», - deıdi QR ASHM baspasóz hatshysy Damır Egizbaev.
Soǵan qaramastan, quzyrly organdar Almatyda ótken jyly 490 kásipkerlik nysanyn teksergen. Onyń 258-i - memleket menshigindegi jerge zańsyz kirgender. Qazir osy kásip ıelerine qatysty tıisti shara qoldaný jaǵy qarastyrylýda.