Almaty qalasynyń ákimi Halyqaralyq qarjy korporasıasynyń (HQK) ókilderimen kezdesti. İs-sharaǵa Taıaý Shyǵys, Ortalyq Azıa, Túrkıa, Aýǵanstan jáne Pákistan boıynsha Halyqaralyq qarjy korporasıasynyń Óńirlik vıse-prezıdenti Hela Sheıhroý, Ortalyq Azıa boıynsha Halyqaralyq qarjy korporasıasy Óńirlik ókildiginiń basshysy Kasandra Kolbert, Qazaqstandaǵy Halyqaralyq qarjy korporasıasy Óńirlik ókildiginiń basshysy Ekaterına Bendjamın jáne basqalar qatysty, dep habarlaıdy Almaty-akshamy.kz.
HQK ókilderiniń aıtýynsha, Almaty Ortalyq Azıadaǵy óńirlik ınvestısıalyq hab bolyp tabylady. Uıym megapolıstiń áleýmettik- ekonomıkalyq damýyna yqpal etedi, mundaǵy basty baǵyttar – qarjy sektory, agrobıznes, ınfraqurylym, klımattyq jáne ekologıalyq ınvestısıalar.
HKQ tehnıkalyq-ekonomıkalyq iri jobalardy odan ári nesıeleý úshin (TEN) 500 myń AQSH dollaryn bólýdi usyndy. Grant aǵymdaǵy jyldyń sońyna deıin kelip túsedi. Qala ákimi Erbolat Dosaevtyń aıtýynsha, Almaty damytý Baǵdarlamasy aıasynda qalanyń sý resýrstary men sý sharýashylyqtary nysandaryn júıeli basqarýdy uıymdastyrý jónindegi áleýetti joba qarastyrylǵan.
Kezdesý barysynda Erbolat Dosaev sondaı-aq jasyl oblıgasıalar men turaqty damý, İT-hab pen venchýrlik qorlardy qurý bóliginde Almaty qalasynyń áleýetti ınvestısıalyq jobalaryn qosa qarjylandyrýǵa HQK qatysýǵa qyzyǵýshylyq bildirdi. Kezdesý qorytyndysy boıynsha taraptar ózara tıimdi áriptestikti nyǵaıtýǵa kelisti.
HQK-men belsendi ekijaqty yntymaqtastyqtyń arqasynda túrli ınvestısıalyq jobalar, sonyń ishinde Almaty halyqaralyq áýejaıy, "BAKAD" memlekettik-jekemenshik jobasy jáne t.b. damydy.
HQK-sy Dúnıejúzilik banktiń enshiles uıymy, eń iri jahandyq damý ınstıtýty, onyń quramyna 185 qatysýshy el kiredi. Qazaqstan 1993 jylǵy 30 qyrkúıekte uıymnyń tolyqqandy múshesi boldy.