Almatyda polısıa men jekemenshik kúzet uıymdary azamattardyń qaýipsizdigin qamtamasyz etý baǵytynda yntymaqtastyqty kúsheıtýde.
Almaty qalalyq polısıa departamentinde qaladaǵy jekemenshik kúzet uıymdarynyń basshylarymen kezdesý ótti. Keńeske polısıanyń tıisti bólimsheleriniń ókilderi men kúzet uıymdarynyń basshylary qatysty, - dep habarlaıdy Aqshamnews.kz.
Kezdesý barysynda ishki ister organdary men jekemenshik kúzet uıymdarynyń ózara is-qımylyn nyǵaıtý, kúzet qyzmetteriniń sapasyn arttyrý jáne adamdar kóp jınalatyn, sondaı-aq balalar bolatyn nysandardaǵy qaýipsizdikti qamtamasyz etý máseleleri talqylandy. Ásirese mektepterge, balabaqshalarǵa, kolejderge, joǵary oqý oryndaryna, densaýlyq saqtaý mekemelerine, saýda-oıyn-saýyq ortalyqtaryna, bazarlarǵa jáne jappaı demalys oryndaryna erekshe nazar aýdaryldy.
- Balalar men azamattardyń kóp jınalatyn nysandardaǵy qaýipsizdigi – basym mindetterdiń biri. Qaýip tóngen jaǵdaıda kúzetshilerdiń kásibıligi men jedel áreket etýge daıyndyǵy qaýiptiń aldyn alýǵa jáne der kezinde áreket etýge tikeleı áser etedi. Qazir biz kúzetshilerdi daıarlaý talaptaryn kúsheıtip, terorızmge osal nysandardaǵy jumys sapasyna qoıylatyn jaýapkershilikti arttyryp jatyrmyz. Polısıa men kúzet uıymdarynyń birlesken jumysy ǵana azamattarymyzdyń naqty qaýipsizdigin qamtamasyz ete alady, – dedi Almaty qalasy PD kúzet qyzmetin baqylaý bóliminiń bastyǵy Bahtıar Temirbekov.
Kezdesý barysynda kúzet uıymdarynyń basshylaryna kúzet salasyndaǵy zańnama talaptary eskertilip, bilim berý jáne densaýlyq saqtaý nysandarynda jumys isteıtin kúzetshilerdiń jas shegin tómendetý, sondaı-aq qyzmetkerlerdiń biliktiligin únemi arttyryp otyrý qajettigi talqylandy. Kezdesý qorytyndysy boıynsha Almaty qalasynda senimdi qaýipsizdik júıesin qurý maqsatynda polısıa men kúzet qurylymdarynyń ózara yntymaqtastyǵyn odan ári damytý týraly kelisimge qol jetkizildi.