Kún tártibindegi mańyzdy másele – qala mektepterindegi qaýipsizdikti qamtamasyz etý.
Almaty polısıasynda ótken arnaıy jıynda mektep oqýshylarynyń qaýipsizdigi talqylandy, dep habarlaıdy Almaty-akshamy.kz Polisia.kz-ke silteme jasap.
Almaty qalasy polısıasynyń bastyǵy Arystanǵanı Zapparovtyń tóraǵalyǵymen ótken jıyn jańa oqý jylynyń bastalýyna oraılastyryldy.
«Bilim berý mekemesiniń qaýipsizdigi – bul bilim berý mekemesiniń jergilikti atqarýshy jáne quqyq qorǵaý organdarymen birlesip júzege asyratyn is-sharalarynyń jıyntyǵy. Mektep oqýshylarynyń qaýipsizdigi bilim berý mekemeleri ákimshiliginiń basty mindeti ekendigi sózsiz, biraq biz de shette qalmaýymyz kerek. Balalardyń qaýipsizdigin qamtamasyz etý mańyzdy baǵyttardyń biri ekendigin jáne osy baǵytta jumys isteýimiz qajettigin atap ótkim keledi. Qalada 207 jalpy bilim berý mekemesi bar, olardyń barlyǵy beınebaqylaý júıesimen jabdyqtalǵan, 4 960 beınekamera ornatylǵan. Árıne, mektepterde beınebaqylaý kameralarynyń bolýy quqyq buzýshylyqtyń aldyn alýǵa oń áserin tıgizedi, al olardyń PD JBO-na qosylýy zańsyz sıpattaǵy túrli kórinisterge jedel den qoıýǵa múmkindik beredi», – dedi Arystanǵanı Zapparov.
Mektepterdi terorıstik turǵydan osal uıymdardyń tizimine engizý, olardy qorǵaýdy sapaly túrde jaqsartýǵa tıis. Mektepterdi tájirıbesi de, materıaldyq resýrstary da bar, qyzmetkerlerdi oqytýǵa qatań talaptar qoıatyn kúzet kompanıalary qorǵaýy kerek.
«Abyroı bolǵanda, ótken oqý jyly mektepterde oqys oqıǵalarsyz ótti, onda eshqandaı quqyqbuzýshylyq oryn alǵan joq. Mektep oqýshylary arasyndaǵy qylmys deńgeıiniń tómendeý tendensıasyn jalǵastyrý úshin, esepte turǵan qıyn jasóspirimdermen jáne olardyń ata-analarymen maqsatty jumysty jalǵastyrý qajet. Quqyqbuzýshylyq pen óz-ózine qol jumsaýǵa beıim jasóspirimderdi anyqtaý, qajetti mamandardy tarta otyryp, olarmen jeke profılaktıkalyq jumystardy júrgizý jumystaryn jalǵastyrý. Taǵy bir aıta keterligi, oqý jylynyń bastalý qarsańynda mektepter mańynda kólik qozǵalysy qıyndaıdy. 31 myńnan astam búldirshin birinshi synypqa barady. Biz olardyń qaýipsizdigin tıisti deńgeıde qamtamasyz etý úshin bar kúsh-jigerimizdi salýymyz kerek», – dedi Zapparov.
Anyqtama úshin: Almaty polısıasy jazǵy demalys kezinde «Demalys», «Jasóspirim» jáne «Túngi qaladaǵy balalar» atty úsh aýqymdy is-shara júrgizdi, nátıjesinde kámeletke tolmaǵandardyń úılerinen tys jerde bolýynyń 2 myńnan astam derekteri anyqtaldy.