Qurmetke bólenip, kezdesýge kelgenderdiń qatarynda tyl ardagerleri de bar
Almaty oblysynda qan maıdanǵa attanyp, sum soǵysqa qatysqan 10 ardager bar, dep habarlaıdy Almaty-akshamy.kz Almaty.tv-ge silteme jasap.
Ǵumyry ǵasyrǵa jalǵasqan maıdangerlerdiń bári bozbala shaqta qarý alyp, soǵysqa attanǵan. Solardyń biri – 99 jasqa tolǵan Sháıke Ydyrysov. Ol 17 jasynda jaıaý ásker qataryna alynyp, Belarýs pen Prýssıany azat etýge qatysqan. Sapta júrip san ret jaraqat alsa da, erligimen kózge túsip, «Erligi úshin», «Qyzyl juldyz» medalderimen marapattalypty.
– Al, balalarym, sender men syılap shaqyrdyńdar, raqmet! Densaýlyq myqty bolsyn! Tilegen tilekterińe, ańsaǵan armandaryńa jetińder. Biraq men kórgen qorlyqty kórmeńder, jaqsylyqtyń kýási bolyńdar, balalarym! – dedi UOS ardageri Sháıke Ydyrysov.
– Bizdiń býyn tarıhty, soǵys ardagerleriniń eńbegin bilýi kerek! Búgingi beıbitshiliktiń qandaı qıyndyqpen kelgenin urpaqtyń túsingeni mańyzdy. Merekede qurmet kórsetip, shaqyryp, elep jatqandaryńa raqmet! Aspanymyz ashyq, ómirimiz tynysh bolsyn!, – dedi UOS ardageri Fódor Kovalóv.
Qart jaýyngerler qatarlastaryn eske aldy. Olardyń dastarhan basyndaǵy jıyny maıdanger-dostarynyń erligin dáriptep, keler urpaqqa beıbit kúnniń baǵasyn túsindirýge ulasty. Al ardagerlerge alǵys aıtyp, qurmet kórsetýde bas bolǵan jomart jan «Soǵysta etigimen qan keship, esepsiz erlik kórsetkenderge syı-qurmettiń qaısysy da laıyq!»deıdi.
– Sol kezde jap-jas kezinde soǵysqa baryp, 5 jyldaı jaýmen shaıqasyp kelgen atalarym ǵoı. Sol úshin mindetti túrde qurmetteýim kerek, qoldaýym kerek. Sol kisilerdiń arqasynda osyndaı dárejege jettim, – dedi kásipker Danıar Nurbaev.
Qurmetke bólenip, kezdesýge kelgenderdiń qatarynda tyl ardagerleri de bar. Aq jaýlyǵy jelbirep, alańsyz kúnniń baǵasyn túsinýge úndegen analar da el irgesiniń beriktigi úshin eńbektenýge shaqyrady. Jıyn sońynda soǵysty kórip, surapyl jyldyń qıyndyǵyn sezgen ardagerler jas urpaqqa aq batasyn berip, keler kúnge beıbit zaman tiledi.