2021 jylǵy 15 tamyzda shamamen saǵat 14.30-da Almaty oblysy Kerbulaq aýdany Jolaman aýylynda qatty, qysqa merzimdi jańbyr túrindegi jaýyn-shashynnyń nátıjesinde Jolaman aýylynyń shetindegi birneshe kósheler men avtojoldar boıymen qarqyndy kólbeý aǵyn júrip ótti, dep habarlaıdy Almaty-akshamy.kz Almaty oblysy TJD baspasóz qyzmetine silteme jasap.
Kólbeý aǵystyń saldarynan zardap shekkender jáne qıraýlar joq. Qazirgi ýaqytta jańbyr toqtap, sý deńgeıi tómendedi, jaǵdaı turaqtandy.
Esterińizge sala keteıik, 14 tamyzda Almaty oblysy Tótenshe jaǵdaılar departamenti 15-16 tamyzda Almaty oblysynyń taýlarynda jáne taýly aýdandarynda qatty jańbyr jaýady degen boljamǵa baılanysty ózenderde sý deńgeıiniń kóterilýi jáne kólbeý aǵyndardyń qalyptasýy kútilip otyrǵany týraly SMS-habarlama, "Dármen" mobıldi qosymshasy, áleýmettik jeliler, sondaı-aq BAQ arqyly daýyldy eskertý taratqan bolatyn.
Almaty oblysynyń TJD azamattardy aýa raıynyń ózgerýin baqylaýǵa jáne qaýipsizdik sharalaryn saqtaýǵa shaqyrady. Daýyl týraly eskertýler men ózge de shuǵyl aqparat alý úshin "Dármen" tegin mobıldi qosymshasyn júktep alýdy usynady.