Almaty oblysynda 1486 adamdy kene shaqqan.
Onyń jartysynan astamy, ıaǵnı, 58%-y — 14 jasqa deıingi balalar, dep habarlaıdy Almaty-akshamy.kz QazAqparatqa silteme jasap.
«Almaty oblysy kene ensefalıti boıynsha endemıalyq aımaqta ornalasqan. Maýsym bastalǵannan beri aýdandar men qalalardyń medısınalyq uıymdaryna 1486 adam júgingen, onyń 58%-y — 14 jasqa deıingi balalar. Ótken jyldyń sáıkes kezeńimen salystyrǵanda kene shaǵýmen 1025 adam medısınalyq kómekke júgingen, onyń 64%-y — 14 jasqa deıingi balalar. Bul kene shaǵý sanynyń 31%-ǵa artqanyn kórsetedi. Bıyldyń sáýir aıynan bastap orman jáne qalalyq saıabaqtar men skverler aýmaǵynda kenege qarsy ý sebý jumystary júrgizildi. Birinshi týr 968 ga aýmaqty qamtydy, bul 11 aýdan jáne 2 qala»,- delingen Almaty oblystyq sanıtarıalyq epıdemıologıalyq qadaǵalaý departamenti baspasóz qyzmetiniń habarlamasynda.
Atap aıtqanda, Aqsý aýdanynda 18 ga, Alakól aýdanynda -51 ga, Eńbekshiqazaq aýdanynda - 235,5 ga, Eskeldi aýdanynda - 55 ga, Qarasaı aýdanynda - 100 ga, Kerbulaq aýdanynda - 40 ga, Raıymbek aýdanynda – 24 ga, Sarqan aýdanynda – 38 ga, Talǵar aýdanynda – 263,5 ga, Uıǵyr aýdanynda-55 ga, Kegen aýdanynda-60 ga jer óńdeldi., Taldyqorǵan qalasynda – 13 ga, Tekeli qalasynda 15 gektar jer kenege qarsy óńdelgen.
«Aıta ketý kerek, kenege qarsy óńdeýdiń ekinshi kezeńi maýsymnyń birinshi jartysynda josparlanǵan. Bul Almaty oblysyndaǵy aýa-raıynyń qolaısyzdyǵyna baılanysty. İs-sharalar bastalar aldynda mindetti túrde aqparattyq belgiler qoıylady, azamattarǵa kenege qarsy óńdeýden keıin 3 táýlik ishinde saıabaqtarǵa, skverlerge jáne tabıǵı oshaqtarǵa nazar aýdarý jáne barmaý qajet. Kene ensefalıtiniń aldyn alýdyń negizgi sharasy vaksınasıa ekenin atap ótken jón. Almaty oblysynda egýdi dárigerdiń keńesinen keıin turǵylyqty jeri boıynsha aýmaqtyq emhanalardan tegin alýǵa bolady»,- dep tolyqtyrdy atalǵan vedomstvonyń baspasóz qyzmetinen.