Vaksına salǵyzyp, utysty boldy
«Mega» saýda ortalyǵy men «Astana Motors» kompanıalary birlesip ótkizgen baıqaý óz máresine jetti. Olar «Mega» keshenderine kelip, vaksına qabyldaǵandar arasynda utys oıyndaryn ótkizgen edi. Jeńiske jetken elordalyq jáne almatylyq turǵyndarǵa avtokólikterdiń kilti tabystaldy, dep habarlaıdy Almaty-akshamy.kz.
Almatylyq Sýhrab Hamraev «Mega Almaty» men «Mega Park» saýda oıyn-saýyq ortalyqtarynda vaksına saldyrýshylar arasynda ótkizilgen utystyń jeńimpazy atandy. Sý jańa kólikke ıe bolǵan jigit vaksınany tamyz aıynda saldyrtqan.
«Arnaıy toltyrýǵa arnalǵan blank berildi. Sony toltyryp, sol jerde qaldyryp kettim. Shynymdy aıtsam, men utamyn dep oılaǵan joqpyn múldem. Kútpegen jaǵdaı boldy. Óte qýanyshtymyn. Sózben aıtyp jetkize almaımyn», - deıdi almatylyq utys ıegeri Sýhrab Hamraev.
Nur-Sultandaǵy «MEGA Silk Way» saýda oıyn-saýyq ortalyǵynda da avtokólik oınatylǵan. Eki qaladaǵy utys ıegerleri onlaın júıesinde anyqtalyp otyr. Elordada temir tulpar kilti Haırolla Ysqaqovqa tabystaldy.
«Áýeli nanǵan joqpyn. Sosyn ınstagramnan qarańyz degennnen keıin qarap prámoı efırdi kórip sodan keıin nandyq. Nanǵannan keıin qýanysh boldy», - deıdi «Mega Silk Way» saýda oıyn-saýyq ortalyǵynda ótken utystyń ıegeri Haırolla Ysqaqov.
«Osy shara arqyly koronavırýs pandemıasymen kúreske óz úlesimizdi qostyq dep oılaımyn. Biraq kólik basty syılyq emes. Bárinen de densaýlyq artyq», - deıdi «Astana Motors» QMK basqarýshy dırektory Denıs Kolomaskıı.
«Vaksına saldyryp, kólik utyp al» aksıasy 23 maýsym men 31 tamyz aralyǵynda ótti. Osy ýaqytta «Mega» saýda oıyn-saýyq ortalyǵy jelisindegi vaksınalaý pýnkterinde 34 myńǵa jýyq adam ekpe alǵan.