7 jáne 8 maýsym kúnderi Almatydaǵy Abaı alańynda saǵat 17:30-dan 22:30-ǵa deıin zamanaýı etnıkalyq mýzykaǵa arnalǵan jyl saıynǵy halyqaralyq The Spirit of Tengri festıvali ótedi, dep habarlaıdy aqshamnews.kz tilshisi.
Almatynyń ımıjdik mádenı jobalarynyń birine aınalǵan bul festıvál taǵy da myńdaǵan kórermendi jınap, dástúr men zamanaýı mýzykany, ulttyq tamyr men jahandyq trendterdi biriktiredi. Bıyl sahnada Qazaqstannan, Italıadan, Kolýmbıadan, Ońtústik Koreıadan, Ózbekstannan, Tájikstannan jáne Bashqurtstannan kelgen tanymal mýzykanttar óner kórsetedi. Qonaqtardy qolóner jármeńkesi, túrli halyqtardyń etnıkalyq taǵamdary jáne asyq atý jarystary kútedi. 8 maýsym kúni AY YOLA jáne OTYKEN festıváldiń basty hedlaınerleri bolady. Artıserdiń naqty óner kórsetý baǵdarlamasyn festıváldiń resmı akkaýnttarynan kórýge bolady.
Sonymen qatar, 8 maýsym kúni The Spirit of Tengri festıvaliniń konserttik bóliginen keıin, Abaı alańynda Respýblıka Saraıynyń aldynda úlken dron shoý ótedi. Jaryq shoýy saǵat 22:00-de bastalady.
Kórermenderdi túngi aspanda Uly dala mádenıeti, túrki halyqtarynyń mıfteri men zamanaýı megapolıs atmosferasynan shabyttanǵan beınelerdi jasaıtyn júzdegen dronnyń tańǵajaıyp kórinisi kútedi. Bul joǵary tehnologıa men tereń sımvolıkanyń úılesimi, túp-tamyr, sabaqtastyq pen damý jaıly kórkem vızýaldy poema.
Aspandy otbasy qundylyqtarynyń sımvoly retinde shanyraq, qobyz ustaǵan Qorqyt, kitap ustaǵan Abaı men dombyra ustap turǵan Qurmanǵazy beıneleri jarqyratady. Sondaı-aq, qalyqtaǵan búrkitpen birge kóterilgen kún, «Almaty, seni jaqsy kóremin» degen jazýy bar júrek jáne basqa da beıneler paıda bolady.
Bul jaryq shoýyna kez kelgen adam qatysa alady – kirý tegin.