Bul jarys byltyrǵy jarystarmen salystyrǵanda ózgeshe ótti.
Qazaq kúresinen «Almaty barysy-2022» týrnıriniń jeńimpazy men júldegerleri belgili boldy, dep habarlaıdy Almaty-akshamy.kz Almaty.tv silteme jasap.
30 sportshynyń arasynda ótken saıysta bozkilemge «Qabanbaı» degen laqap atymen shyqqan Erasyl Janataev top jardy. 2-oryn Ersultan Jorabekke buıyrsa, úzdik úshtikten Ernar Maǵaýınov kórindi. Bul jarys byltyrǵy jarystarmen salystyrǵanda ózgeshe ótti. Qazaq kúresine engen jańa erejelerge baılanysty búk upaıy alynyp tastaldy. Endi palýandar tek taza jáne jartylaı jeńis, jambas ádisteri arqyly ǵana jeńiske jete alady.
«Bul endi qazirgi qazaq kúresindegi ádis-tásilderdiń dınamıkasyn arttyrý úshin istelip otyrǵan ereje. Bul jerde negizinen palýandar kúrestiń dınamıkasyn kúsheıtedi. Bir sózben aıtqanda, ádister kóbirek qoldanylady», – dedi bas tóreshi Erkin Saıdaqov.
«Qazaqstan barysy» týrnıriniń aqtyq kezeńi 3 shildede elordada ótedi dep josparlanyp otyr. Oǵan ár óńirden irikteýlerde 1 jáne 2 oryn alǵan sportshylar qatysady. Atalmysh saıystyń 3 dúrkin júldegeri Rýslan Ábdirazaqov búginde jastar arasyndaǵy básekelestik joǵary ekenin aıtady.
«Ózim osy 2 shákirt daıyndap edim. Olar dzúdomen aınalysady. Qazaq kúresinen birinshi jarystary. Yńǵaıyn taba almaı jatyr. Endi, Alla qalasa, aldaǵy ýaqytta shákirtterimniń deńgeıin ósirsem degen oıym bar», – dedi sportshy Rýslan Ábdirazaqov.