Azıa damý bankiniń (ADB) prezıdenti Masasýgý Asakavamen kezdesýde Almaty ákimi Erbolat Dosaev jasyl ekonomıka jobalaryn iske asyrýdaǵy yntymaqtastyq máselelerin talqylady, Banktiń qalalyq ortany jaqsartýǵa qosqan baǵa jetpes úlesin atap ótti, dep habarlaıdy almaty-akshamy.kz
Belgilisi, qazirgi kezde Almaty ákimdigi ekologıany jaqsartý boıynsha jan-jaqty sharalar qabyldaýda. Bekitilgen «2025 jylǵa deıingi damý jáne 2030 jylǵa deıingi orta merzimdi perspektıvalar baǵdarlamasy» aıasynda qoǵamdyq kólikti ekologıalandyrý jáne ónerkásiptik kásiporyndardan shyǵaryndylardy azaıtý jónindegi jobalar iske asyrylýda. ADB qatysýymen aǵymdaǵy jyldyń 31 mamyrynda JEO-2 jańǵyrtý týraly kelisim jasaldy. JEO-2-ni tabıǵı gazǵa aýystyrý nátıjesinde zıandy shyǵaryndylar jylyna 37,3 myń tonnadan 2,7 myń tonnaǵa deıin nemese 90%-ǵa qysqarady dep kútilýde. Jobanyń Almatyda aýa sapasyn jaqsartýǵa jáne tazartýǵa qosatyn úlesi zor bolady. Jylyna taǵy 2 myń tonnaǵa qoǵamdyq kólikti jańǵyrtý esebinen zıandy shyǵaryndylardyń azaıýy boljanýda. Almaty ákimdigi 200 jańa troleıbýs satyp alýdy jáne qoldanystaǵy 1,2 myń dızeldi avtobýsty gaz jáne elektr tartymyna aýystyrýdy josparlap otyr. Arnaıy gazben júretin avtobýstarǵa qyzmet kórsetý úshin 2 avtobýs parki men 5 gaz quıý stansıasy salynady.
Ótken jyly ADB-men birlesip Almatyda qorshaǵan ortany lastaıtyn aýanyń sapasyn ólsheýge arnalǵan 50 aspap (PM 2.5, PM10, NO2 qatty bólshekter) ornatyldy, olar Qazgıdromettiń aqparattyq júıesimen ıntegrasıalanǵan jáne atmosferalyq aýanyń tolyq jaǵdaıyn onlaın rejıminde baqylaýǵa múmkindik beredi. Aǵymdaǵy jyldyń sáýir aıynda Bank turmystyq jylytý júıelerin kómirden taza otynǵa aýystyrý, qoǵamdyq kólik ınfraqurylymyn jańǵyrtý, «Almaty taza qala» jáne taǵy basqa is-qımyl josparyn usyndy. Qazirgi ýaqytta jospardy «Green Almaty» jobalyq ofısi ári qaraı usynystardy iske asyrý jónindegi sharalardy ázirleýde jáne zertteýde.
Kezdesý qorytyndysy boıynsha taraptar jasyl ekonomıkany ilgeriletý jónindegi bastamalardy qoldaýdyń mańyzdylyǵyn atap ótti jáne ekijaqty yntymaqtastyqty keńeıtý týraly ýaǵdalasty. Almaty ákimdigi men Azıa Damý Banki arasyndaǵy yntymaqtastyqtyń perspektıvalary LRT jelisin salý, elektr avtobýstaryn satyp alý jáne zarádtaý stansıalaryn qurý, turǵyn úı qory men qoǵamdyq ǵımarattardyń energoaýdıtin júrgizý aıasynda órbıtin bolady.