Almaly aýdanynda Almaty ákimi Erbolat Dosaevtyń halyqpen kezekti kezdesýi ótti. Qala basshysy aýdannyń damýy jáne turǵyndardan túsken usynystar boıynsha atqarylǵan jumystar týraly aıtyp berdi. Kezdesýge 250-den astam adam keldi, - dep habarlaıdy almaty-akshamy.kz
Aýdanda komýnaldyq ınfraqurylymdy jańǵyrtý ózekti másele bolyp qala beredi. Aýdandy turaqty elektrmen jabdyqtaýdy qamtamasyz etý úshin 58,5 km elektr jelileri aýystyryldy, 10 taratý jáne 50 transformatorlyq qosalqy stansıalar jańǵyrtyldy. 2023 jyly aýdannyń 97,5 km jelileri, 3 taratý jáne 145 transformatorlyq qosalqy stansıalary qaıta jańartylady. Sondaı-aq, aýdanda uzyndyǵy tıisinshe 437 metr jáne 415 metr sý qubyry jáne jylý jelileri rekonstrýksıalanady.
Qala ákimi Erbolat Dosaevtyń aıtýynsha, aýdandaǵy joldardyń paıdalaný sıpattamalaryn jaqsartý úshin jalpy uzyndyǵy 13 km 16 kóshege ortasha jóndeý júrgizildi, 15 qarashaǵa deıin 2 kóshede taǵy 1155 metr jol tósemi jóndeledi.
Oqýshy oryndarynyń tapshylyǵyn tómendetý úshin aǵymdaǵy jyldyń basynda eki mekteptiń janyndaǵy 850 oryndy 2 qosalqy nysan iske qosyldy. Sonymen qatar, 10 qarashada 850 oryndy jeke gımnazıa ashylady. 2023 jyly 3 mektepti kúrdeli jóndeý qarastyrylǵan.
Mektepke deıingi uıymdardaǵy oryn tapshylyǵyn qysqartý maqsatynda jyl basynan beri Almaly aýdanynda 225 oryndy 5 jekemenshik balabaqsha ashyldy. Jumys istep turǵan №43 balabaqsha ǵımaratynyń bir bóligin satyp alý esebinen 75 qosymsha oryn qamtamasyz etildi. №7 mektepke deıingi mekemeni seısmıkalyq kúsheıtý aıaqtaldy. 2023 jyly eki balabaqshany kúrdeli jóndeý josparlanǵan.
Medısınalyq qyzmet kórsetýdiń, ásirese aǵa býyn ókilderiniń osy qyzmetke qadamdyq qoljetimdiligin qamtamasyz etý úshin UOS qalalyq emhanasynyń ǵımaratyn kúrdeli jóndeýge jáne 500 kelýshige arnalǵan jańa emhana salýǵa daıyndyq júrgizilýde. Eki densaýlyq saqtaý mekemesinde de jumys 2023 jylǵa josparlanǵan.
Aýdanda qatty jaýyn-shashyn kezinde sý basý máselesi ózekti bolyp qalýda. TJ jelisi boıynsha 12 ýchaskeni joıý jumystary júrgizilýde. 4 ýchaske boıynsha jumystar aıaqtaldy. Jyl sońyna deıin Maqataev kóshesiniń boıynda jalpy uzyndyǵy 3,6 km kolektor qalpyna keltiriledi, qosymsha 2,3 km jańa aryq jelileri jáne Raıymbek dańǵyly boıyna 1,6 km kanal salynady. Qarasha aıynda 52 ýchaskede 34 km aryq jelisin qaıta qurý jáne salý bastalady. Jumystardy 2024 jyldyń sońyna deıin aıaqtaý josparlanýda.
Qalanyń tarıhı ortalyǵy retinde aýdan turǵyndary úshin ózekti másele shaǵynqabatty úıler men jasyl qordy saqtaý bolyp tabylady. Bıylǵy jyly 40 shaǵynqabatty úılerdiń qasbetteri jóndeldi, 15 qarashaǵa deıin qalǵan 4 qasbeti jóndeledi. Jasyl qordy jasartý jáne jańartý baǵdarlamasy aıasynda 5400 aǵashqa sanıtarlyq kesý júrgizildi, jalpy paıdalaný oryndaryndaǵy apatty aǵashtardyń 660 dińi kesildi. Qarasha aıynyń sońyna deıin kesilgen aǵashtardyń ornyna 2500 jas aǵash otyrǵyzylady.
Sondaı-aq, qala ákimi Erbolat Dosaev aýdannyń qoǵamdyq qaýipsizdigin qamtamasyz etý sharalary týraly da habardar etti. Máselen, jyl sońyna deıin 541 beınekamera ornatylady. Qoldanystaǵylarǵa qosymsha 400 kameraǵa 38 «Sergek» AÓK ornatylady. Jalpy, jumys aıaqtalǵannan keıin beınebaqylaý kameralarynyń jalpy sany 1469 birlikti quraıtyn bolady.
«Halyq qatysatyn búdjet» baǵdarlamasy boıynsha aýdanda 800 mln teńgege 39 joba iske asyryldy. Iaǵnı, 2 gúlzar, 8 qoǵamdyq oryn jáne 21 aýla abattandyryldy.
Almaty ákimimen kezdesý barysynda turǵyndar joldardy jóndeý, káriz jáne elektr jelilerin abattandyrý jáne t.b. máselelerdi kóterdi.
Memleket basshysy Qasym-Jomart Toqaevtyń Jarlyǵymen bekitilgen halyqpen kezdesýdiń jańa formatyna sáıkes, jyl sońyna deıin Erbolat Dosaev halyqpen 24 kezdesý ótkizedi – 8 aýdannyń árqaısysynyń turǵyndarymen toqsanyna bir kezdesý.