Bul ǵımarat paıdalanýǵa qazan aıynda beriledi.
Almaty ákimdiginiń ǵımaratyn qalpyna keltirý mamyrda aıaqtalmaıtyn boldy. Bul týraly Májilistiń jalpy otyrysynda QR Premer-Mınıstriniń birinshi orynbasary Roman Sklár aıtty, dep habarlaıdy Almaty-akshamy.kz Aikyn.kz silteme jasap.
Roman Sklárdyń aıtýynsha, qańtardaǵy qyrǵyn kezinde otqa oranyp, jaramsyz bolyp qalǵan qalalyq ákimdiktiń ǵımaraty qazan aıynda paıdalanýǵa beriledi.
«Keltirilgen shyǵyndy eskere otyryp, Almaty ákimdigi men Qazaqstan UTA ǵımarattaryn qaıta qalpyna keltirý jumystary 2022 jyldyń qazan aıynda aıaqtalady dep kútilýde», – dedi Úkimet basshysynyń birinshi orynbasary.
Esterińizge sala keteıik, buǵan deıin Almaty ákimdigi atalǵan ǵımaratty qaıta jóndeý jumystary mamyr aıynda tolyqtaı aıaqtalady dep málimdegen bolatyn. Olar sondaı-aq ǵımaratty tolyqtaı qalpyna keltirý úshin 20 mıllıard teńge ketedi degen. Bul somany zardap shekken nysandardyń shyǵynyn esepteý jónindegi komısıa taǵaıyndaǵan.
Vıse-premerdiń aıtýynsha, qajetti qarajat memleket rezervinen, sondaı-aq jeke qarajat esebinen júzege asyrylady.