30 maýsymda Óńirlik komýnıkasıalar qyzmetiniń alańynda Almaty qalasy Sıfrlandyrý basqarmasynyń basshysy Baıan Qońyrbaev pen Yandex.Cloud JSHQ bas dırektory Oleg Koverznev onlaın-rejımde megapolıs aýmaǵynda bultty tehnologıalardy damytý jónindegi kelisimge qol qoıdy.
Almaty Yandex.Cloud-tyń jergilikti bılik ókilderimen yntymaqtastyq barysynda qalalyq qyzmetterdiń atqaratyn jumystarynyń tıimdiligin arttyratyn alǵashqy qala bolyp tabylady.
Almaty qalasy Sıfrlandyrý basqarmasynyń basshysy Baıan Qońyrbaev atap ótkendeı, yntymaqtastyq barysynda qala turǵyndarynyń jergilikti atqarýshy organdar ókilderimen ózara is-qımyldy jaqsartý, sondaı-aq halyqqa kórsetiletin qyzmetterdiń tıimdiligi men sapasyn arttyrý úshin jobalardy iske asyrý josparlandy.
Baıan Qońyrbaev qalanyń baılanys ortalyqtarynyń birin robottandyrý jóninde mysal keltirdi.
«Túsken qońyraýlardyń barlyǵy avtomatty túrde óńdelip,tıisti qala qyzmetterine jiberiledi. Munda daýysty kómekshiler dep atalatyndar qyzmet atqarady. Bul baılanys ortalyqtarynyń jumystaryn jeńildetedi", – dedi B. Qońyrbaev.
Yandex.Cloud JSHQ bas dırektory Oleg Koverznev "Daýysty kómekshiler" jobasy tanymal "Alısa" kómekshisiniń ıdeıasyna negizdelgenin, biraq bul jańa múmkindigi bar basqa ónim ekenin aıtty.
"Daýystyq kómekshilerdiń arqasynda koll-ortalyǵyndaǵy suraýlar óńdeletin bolady. Bul jumys Máskeý qalasynda indet kezinde qońyraýlar kóp bolǵanda synaldy. Qońyraýlardyń bir bóligi robottarmen óńdeldi. Daýystyq kómekshiler birqatar reseılik bankterge, Reseı poshtasyna beıimdelgen. Bul tehnologıalar Almatyda da engiziletin bolady", – dedi O. Koverznev.
Almatyda "1308" qalalyq baılanys ortalyǵy avtomattandyryldy. Al daýys kómekshilerin qazaqstandyq uıaly baılanys operatorlary qoldanady. Búginde tek orys tilinde qoldanylady, biraq aldaǵy aıda qazaq tilinde sóıleý júzege asyrylady.
Sondaı-aq kelisimshart Yandex.Cloud-tyń qala aýmaǵynda iske asyrylatyn hakatondar men konkýrstardyń tehnologıalyq seriktesi retinde jáne jasandy ıntellekt pen úlken derekter salasyndaǵy pılottyq pen testtik jobalardy qoldaýdy bildiredi.
"Almaty qalasynyń ákimi Baqytjan Saǵyntaevtyń tapsyrmasy boıynsha biz "Aqyldy qala" baǵdarlamasyn júzege asyryp jatyrmyz. Yandex.Cloud platformasymen kelisimge qol qoıý arqyly biz uzaq merzimdi yntymaqtastyq pen tehnologıalyq bastamalarda oń nátıjege qol jetkizýge úmittenemiz. Sondaı-aq, Almaty turǵyndary úshin sıfrlyq jobalardy iske asyrýǵa tek bultty tehnologıalardy ǵana emes, Iandeks kompanıasynyń basqa da ónimderin usynamyz. Sondaı-aq úzdik IT mamandardyń 70%-dan astamy Almatyda turady, bizdiń mindetimiz olar úshin damýdyń barlyq jaǵdaıyn jasaý", – deıdi Almaty qalasy Sıfrlandyrý Basqarmasynyń basshysy Baıan Qońyrbaev.
Orta merzimdi perspektıvada densaýlyq saqtaý salasyndaǵy bastamalar, onyń ishinde medısınalyq keskinderdi taldaý, óńdeý men saqtaý úshin medısınalyq sheshimderdi qoldaý júıeleri boıynsha ári derekterdi saqtaý úshin biryńǵaı júıeni qurý jónindegi usynystar bolady.
Yandex.Cloud JSHQ bas dırektory Oleg Koverznev kompanıanyń qoldaýy arqasynda almatylyq kásipkerler men startaptar ózderiniń sıfrlyq ónimderin jasaı alatynyn aıtty. “Yandex.Cloud” ıdeıalarǵa da, jobalardy súıemeldeýge de kómektesedi.
“Búginde ómirimizdiń kez kelgen salasyn sıfrlandyrýǵa bolady. Bizdiń platforma qala turǵyndaryna múmkindik beredi. Teorıa júzinde emes, is júzinde startaptardyń qandaı ónimder jasaı alatyndyǵyn kórsetý. Bizdiń praktıkalyq jumys kelisimshartqa qol qoıylǵanǵa deıin bastaldy. Ári qaraı biz búkil Qazaqstan biletin sátti mysaldar men nátıjeli isterdi kútemiz", – dedi Oleg Koverznev.
Yandex.Cloud ókilderi kóptegen reseılik farmasevtıkalyq kompanıalar men bankterdiń óz júıelerin iske asyrýǵa qoldaý kórsetkenderin aıtty. Mundaı tájirıbe Almatyda da engiziletin bolady. Qazaqstanda qazirdiń ózinde oń nátıjeler bar. Búginde birqatar otandyq kompanıalar vakansıalarǵa úmitkerlerdi irikteý, ofıs qyzmetkerleriniń jumys ýaqyttaryn júıeleý kezinde jańa tehnologıalardy qoldanýda.