«Qazaqtelekom» ózine qatysty kez kelgen máseleniń túıinin nege ózinen emes, ózgeden izdeıdi?
«Qazaqtelekom» mekemesiniń qyzmet kórsetý jumysyn synǵa alǵan maqalalarymyzdan keıin «Alataý Aqparat» ujymynyń redaksıalaryna ulttyq operatordyń Almatydaǵy bólimshesine kóńili tolmaıtyn oqyrmandarymyzdan shaǵym hattardyń jańa legi kelip tústi. Redaksıaǵa shaǵymdanǵandardyń kópshiligi – ómirde talaı kóılek tozdyrǵan qurmetti jastaǵy bizdiń oqyrmandarymyz. Olardyń kópshiligi ulttyq baılanys operatorynyń óz qyzmetteriniń qunyn ashyq túrde «ósiretinin», sóıte tura, baılanystyń laıyqty sapamen qamtamasyz etpeıtinin, ne óz qyzmetterin múmkindiginshe nemquraıly jasaıtyndaryn aıtady.
Zeınetkerler «Almatytelekomǵa» nege narazy?
89 jastaǵy zeınetker Ablımıt Japparov Ulttyq baılanys operatorynyń «kishi balasy» – «Almatytelekommen» qandaı shıelenisken qarym-qatynasta ekenin baıandap berdi. Ol redaksıamyzǵa «Almatytelekom» basshylyǵyna jazylǵan málimdemeni jáne oǵan «Bólshek bıznes boıynsha dıvızıonnan» berilgen jaýapty kórsetti – «Qazaqtelekom»AQ-nyń taǵy bir fılıaly osylaı atalady. «Dıvızıon» sóziniń ózi mılıtarısik maǵyna beredi, osydan-aq otandyq baılanys operatory tutynýshylarymen óz paıdasy úshin qandaı da daýǵa barýǵa daıyn ekeni jáne jalpy qandaı ıdeologıa ustanatyny kórinetindeı sezim týady.
Ablımıt Abdýllauly «Almatytelekom» basshylyǵyna jazǵan hatynda ony telefon arqyly kompanıa qyzmetkeri basqa operatordan bas tartýǵa jáne «Qazaqtelekom» qyzmetterine aýysýǵa qalaı kóndirgeni týraly baıandaıdy. Zeınetker ádepkide baılanys operatory qyzmetkeriniń arbaý-usynysyna kelisip, aldanyp qalǵanyn aıtady.
– Men aı saıyn jáne birneshe márte qyzmetterdi tóleýge resmı shot jiberýlerińizdi surap kelemin. Oǵan qaramastan, maǵan qalalyq telefon arqyly tólem somasyn aýyzsha habarlaý jalǵasýda. Men 89 jastamyn, ekinshi toptaǵy múgedekpin, aıyna bir ret poshta bólimshesine komýnaldyq tólemderdi tóleý úshin baramyn, – delingen zeınetker málimdemesinde.
«Bul – qarjylyq tártipti óreskel buzý»
Ol «Almatytelekom» qyzmetiniń tólemi týraly jazbany túbirtekke qosýdy birneshe ret suraǵan. Zeınetkerge ár joly ýáde beriledi eken, alaıda eshteńe ózgermeıdi.
– Bul qarjylyq tártipti óreskel buzý bolsa da, tólem somasyn aýyzsha habarlaý biraz ýaqytqa jalǵasty, – dep shaǵymdanady zeınetker.
2022 jyldyń aqpan aıynda qurmetti jastaǵy almatylyqtyń ótinishi oryndalady – tólem túbirteginde «Almatytelekom» boıynsha jazba paıda boldy. Biraq... bul qaǵazda 450 teńge ósimaqy eseptelgen. Zeınetker muny adamdy qorlaý dep sanaıdy.
– Tólem shotyn usynbaı, tártipti buzǵan siz, meniń júıkemdi juqartyp, qyzmetterdi únemi óshiremin dep qorqytqan da siz, meniń komýnaldyq tólemder týraly túbirtekke aı saıynǵy tólem boıynsha jazbany qosý týraly ótinishimdi elemegen de siz. Sonda men ne úshin aıyppul tóleýim kerek? – dep Ablımıt Japparov «Almatytelekom» basshylyǵyna jazǵan hatynda tańdanysyn bildiredi.
Sapasyz qyzmet – jaýapsyz qyzmetker...
Almatylyq aqsaqaldyń bul narazylyǵyna tek bir aıdan keıin ǵana jaýap berilgen.
– 21 shilde kúni maǵan kópten kútken jaýap keldi (kóshirmesi saqtaýly – redaksıa). Shynymdy aıtsam, olar meniń ótinishimdi qarap, ózderine de, maǵan da paıdaly bolatyn sheshim shyǵarady dep kúttim. Biraq maǵan berilgen bir japyraq qaǵazda jaýaptyń ne nómiri, ne kúni, tipti laýazymdy adamnyń qoıylǵan qoly joq. Bul «Qazaqtelekom» qyzmetkerleriniń tolyq jaýapsyzdyǵyn kórsetedi. Ulttyq operatordyń túsiniginshe, eger habarlama jetkizilmese, «Qazposhta» kináli, sondaı-aq habarlamanyń bar-joǵyna qaramastan, «Qazaqtelekom» qyzmetine aqy tólemegen abonent kináli. Al "Qazaqtelekomnyń" ózi «sútten aq, sýdan taza», – deıdi zeınetker.
Ablımıt Japparov aqpan aıynda «Almatytelekom» bólimshesine barǵan. Oǵan baılanys operatorynyń qyzmetkeri túpkilikti esep aıyrysý somasy – 4449,48 teńge bolǵanyn óz qolymen jazyp bergen. Sonymen qatar, osy soma ótelgende, onyń eshqandaı qaryzy bolmaıdy dep ýáde bergen, alaıda naýryz aıynda – 233,47 teńgege abonenttiń qaıta qaryzy shyǵady.
– Biz, toqsan jastaǵy qarttar men zeınetkerler, uıaly telefondy negizinen týystarymyzben jáne jedel járdem bólimshesimen sóılesý úshin qoldanamyz. Osymen telefondaǵy bar qajettiligimiz aıaqtalady. Sondyqtan «Qazaqtelekomnyń» jaýabynan ǵana men 24-tarmaq (telekomýnıkasıa qyzmetterin kórsetý sharty – redaksıa) boıynsha shot ne tólem týraly túbirtek usynylmasa da, barlyq qyzmetterge aqy tóleýge mindetteletinimdi bildim. Qazir bul tarmaq «...eshqandaı qyzmet kórsetilmese de» degen sózdermen tolyqsa da, tańqalmas edim, – deıdi zeınetker.
Ardagerler qamqorlyq pen qoldaýǵa zárý
Sóz sońynda Ablımıt Japparov redaksıamyzǵa taǵy bir zeınetkerdiń oqıǵasyn aıtyp berdi. Ol kisi múmkindigi shekteýli jan bolsa da, ózi eńbek ardageri. Oǵan ózin «Qazaqtelekomnyń» qyzmetkeri dep tanystyrǵan boıjetken habarlasyp, ardagerdiń telefony basqa baılanys túrine aýystyrylatynyn aıtyp, elektr qýaty joǵalǵan jaǵdaıda, baılanys óshetinin eskertken. Ardagerge árdaıym medısınalyq kómek jáne baılanys qajet bolǵandyqtan, mundaı ózgeristerden bas tartqan. Degenmen, ony tyńdaǵan eshkim bolǵan joq, onyń telefony... jaı ǵana óship qalǵan.
Ablımıt Japparov qalalyq Ardagerler keńesiniń múshesi retinde joldasyna kómektesýge tyrysyp, «Qazaqtelekomǵa» tynymsyz qońyraý shalady. Biraq zeınetkerdi elep-eskergen, estigen eshkim bolmady. Sodan keıin onyń telefony istemeı qaldy…