Energetıka mınıstrligi atom energetıkasy jáne ónerkásibi departamentiniń dırektory Jaslan Qasenov Ortalyq komýnıkasıalar qyzmetinde ótken brıfıńte atom energetıkasyn damytyp jatqan elder týraly aqparat berdi.
Onyń aıtýynsha, qazirgi ýaqytta álemde 31 memleket atom elektr stansıasyn (AES) paıdalanyp otyr. 2022 jylǵy aqpandaǵy jaǵdaı boıynsha, álemde jalpy qýaty shamamen 391 GVt bolatyn 439 energetıkalyq reaktor bar, sondaı-aq 55 GVt qýaty bar taǵy 52 reaktor salynyp jatyr.
Atom energetıkasyn aıtarlyqtaı qoldanyp otyrǵan elder qatarynda AQSH, Fransıa, Qytaı, Japonıa, Reseı jáne Ońtústik Koreıa bar. Bul elderdiń árqaısysynda 25 GVt-tan astam qýattylyq bar. Kanada men Ýkraınada shamamen 13 GVt, al Ulybrıtanıa, Germanıa, Shvesıa, Ispanıa, Úndistan jáne Belgıada shamamen 5-10 GVt energıa berip turǵan AES ornatylǵan. Taǵy 18 elde árqaısysy 0,4 - 4 GVt dálizinde belgilengen qýaty bar bir nemese birneshe reaktor bar.
Sonymen qatar, Jaslan Qasenov atom energetıkasyna bet burǵan elderdiń kartasy alty qurlyqty birdeı qamtıtynyn atap ótti. Mysaly, Fransıa on jyl oılanyp, ıadrolyq energetıkaǵa senim artatyn bolyp, 14 jańa reaktor ornatýdy josparlap otyr, olardyń birinshisi 2035 jylǵa qaraı iske qosylady. Túrkıa, Birikken Arab Ámirlikteri, Belarýs sıaqty elder óz tarıhynda alǵash ret AES salyp jatyr. Buryn AES-ten bas tartqan Polsha qazir atomdyq energetıkalyq baǵdarlamasyn jańartýǵa daıyndalýda.
Afrıka men Taıaý Shyǵys elderi de AES salýǵa qyzyǵýshylyq tanytyp otyr. Eýropalyq komısıa da Eýropalyq Odaq múshelerine 2050 jylǵa qaraı kómirtegi beıtaraptyǵyna kóshý baǵdarlamasyna atom energetıkasyn qosý josparlanǵan qaýly jobasyn usyndy.