Semeıde qazaqtyń kórnekti aǵartýshysy, qoǵam qaıratkeri jáne saıası pýblısıs Ahmet Baıtursynulynyń 150 jyldyǵyna arnalǵan «Sońǵy úkim» tarıhı fılminiń túsirilimi aıaqtaldy.
Týyndy QR Mádenıet jáne sport mınıstrliginiń tapsyrysy boıynsha Ulttyq kınony qoldaý memlekettik ortalyǵynyń kómegimen óndiriske engizildi, dep habarlaıdy Almaty-akshamy.kz QazAqparatqa silteme jasap.
Jobanyń túsirilimi ótken jyly Almatyda bastalǵan. Bıyl túsirilim prosesiniń negizgi bóligi Semeı qalasynda jáne Almaty men Abaı oblystarynyń tabıǵı nysandarynda ótti.
Qazirgi ýaqytta kartınany montajdaý kezeńi júrip jatyr. Al fılmniń tusaýkeseri 2023 jyldyń 2 aqpanyna josparlanǵan.
Sebebi osy kúni Baıtursynuly redaktor bolǵan alǵashqy kásibı «Qazaq» gazetiniń 110 jyldyǵy toılanady.
Fılm HH ǵasyrdyń basyndaǵy qazaq saıası elıtasynyń eń jarqyn kóshbasshylarynyń biri, qazaq gramatıkasynyń negizin qalaýshy, ǵalym, aqyn jáne pýblısıs ómiriniń qyryq jylyn qamtıtyn shaǵyn epızodtardan turady.
Kınojoba bastaýysh mekteptiń qarapaıym oqytýshysynan ulttyń ustazyna aınalǵan Ahmettiń tańǵajaıyp taǵdyryna áser etken mańyzdy oqıǵalar týraly baıandaıdy.
«Alash» partıasynyń negizin qalaýshylardyń biri, qýdalanǵan, birneshe ret qamaýǵa alynǵan.
Biraq, soǵan qaramastan, tolyq drama men tragedıaǵa toly dáýirde ádemi mahabbatqa da oryn taba bilgen saıasatker-kúreskerdiń arpalysqa toly ómiri kórsetiledi.
Basty rólde Azamat Satybaldy. Sondaı-aq, fılmde Dará Aleksandrova, Aleksandr Bagránsev, Erlan Káribaev jáne basqalar oınady.
«Ahmet Baıtursynuly – bizdiń maqtanyshymyz. Meniń oıymsha, bizdiń jas urpaq osyndaı fılmderdi kórýi tıis. Óıtkeni, Ahmettiń jasaǵan isi, Alashorda qaıratkerleriniń erligi – búgin kezdespeıtin batyldyq. Sondyqtan sol kezdegi oqıǵalardy zamanaýı kórermenge kórsetý kerek», - deıdi basty róldi oryndap shyqqan Azamat Satybaldy.
Túsirilim tobyn rejıserler Erlan Nurmuhambetov pen Ergen Toqmýrzın basqardy.
Qoıýshy-operator - Mars Omarov. Bas prodúser - Dastan Atyǵaev. Senarı avtory - Ǵalym Dosken.