Almatyda aınalany qoqystan tazartyp, aǵash egý ekologıalyq aksıasy ótip jatyr. "Kókjıek" yqshamaýdanyndaǵy senbilikti «Qazaqstandy kógaldandyrý» qaýymdastyǵynyń belsendileri uıymdastyrdy.
– Qaýymdastyq 2015 jyldan beri jumys isteıdi. Biz kógaldandyrýmen aınalysamyz. Qazir bizdiń qatarymyzda tek Almaty ǵana emes, búkil Qazaqstan boıynsha júzden astam kompanıa bar. Qaýymdastyq birneshe sala mamandaryn biriktirip otyr. Biz qala ákimdigimen tyǵyz baılanys ornatyp qana qoımaı, jasyl jelek boıynsha erejelerdi birlesip ázirleý, konsýltasıalyq kómek kórsetý jumysyna atsalysyp, sondaı-aq osy tektes aksıalardy ótkizýde ózimizdiń kásibı kómegimizdi usynamyz. Búgin 200 akasıa aǵashy otyrǵyzylady. Bizdiń mamandar bul aǵashtardy qalaı durys egip, ony baptaý kerektigin aıtyp qana qoımaı, búkil prosesti baqylaıdy. Óz betimen aǵash otyrǵyzǵysy keletin belsendilerge eń áýeli qalalyq ákimdikke, sonyń ishinde Ekologıa jáne qorshaǵan orta basqarmasyna habarlasý kerektigin aıtamyn. Basqarma kómek kórsetip, jer bólip qana qoımaı, birqatar usynys ta beredi. Bul rette aǵash egý jetkiliksiz. Oǵan durys kútim de jasaı bilý kerek, – dedi «Qazaqstandy kógaldandyrý» qaýymdastyǵynyń prezıdenti Tatána Antonenko.